Astanadaǵy Travmatologııa jáne ortopedııa ǵylymı-zertteý ınstıtýty dırektorynyń klınıkalyq jumys jónindegi orynbasary Shalǵynbaı Baımaǵambetov Memleket basshysy Joldaýynyń basty maqsaty – qazaqstandyqtardyń ómir sapasyn jaqsartý ekendigin aıtady.
«El Prezıdenti N.Á.Nazarbaevtyń kezekti Joldaýy – tórtinshi ónerkásiptik revolıýsııa jaǵdaıyndaǵy Qazaqstandy júıeli jańǵyrtý sharalarynyń naqty baǵdarlamasy. Densaýlyq saqtaý salasy boıynsha Elbasy birqatar basym baǵyttardy anyqtady, onyń ishinde medısınalyq kómektiń qoljetimdiligi men tıimdiligin arttyrý, ásirese aýyldyq jerlerde, aýrýlardyń aldyn alý jáne emdeýde jańa tehnologııalardy qoldaný máselesine basymdyqtar berilýde», dedi ol.
Memleket úshin tıimdiligi az jáne shyǵyny kóp dıspanserlik em qoldanýdan, negizgi sozylmaly aýrýlarǵa qashyqtan dıagnostıka jasap, sondaı-aq osy salany ambýlatorııalyq emdeý arqyly basqarýǵa kóshý qajettigi paıda bolýda.
Zamanaýı densaýlyq saqtaý qyzmeti qymbat stasıonarlyq emdelýge emes, aýrýlardyń aldyn alýǵa kóp kóńil bólýi kerek. Salamatty ómir saltyn nasıhattaı otyryp, qoǵamdyq densaýlyq saqtaýdy basqarýdy zaman talabyna saı jetildirýge, jastardyń reprodýksııalyq densaýlyǵyn qorǵaý men kúsheıtýge erekshe nazar aýdarylmaq.
«Aldyn alý medısınasy – HHI ǵasyrdaǵy densaýlyq saqtaýdyń negizgi trendi. Aqparattyq júıelerdi, mobıldi sıfrly qosymshalardy biriktirý, elektrondy densaýlyq pasportyn engizý, medısınalyq qujattamany qaǵazsyz júrgizýge kóshýdi qoldana otyryp, densaýlyq saqtaý salasyndaǵy qyzmetterdi barynsha jaqsartýymyz qajet», dedi ol.
Elimizde memlekettiń jáne jumys berýshiniń ortaq jaýapkershiligine negizdelgen Mindetti áleýmettik medısınalyq saqtandyrý (MÁMS) júıesine kezeń-kezeńimen kóshý jalǵasýda. Ony engizý qajettiligi zamanaýı shyndyqqa sáıkes kelip otyr jáne álemdik ozyq tájirıbeler arqyly dáleldenýde. Halyq sanynyń ósýi jáne ómir súrý uzaqtyǵyn qamtamasyz etý sharalary medısınalyq qyzmetti tutyný kóleminiń artýyna ákeldi. Sondyqtan Memleket basshysy óz Joldaýynda densaýlyq saqtaýǵa jumsalatyn shyǵyndardy IJО́-niń 7 paıyzynan 10 paıyzyna deıin kóterý týraly naqty tapsyrma berdi. Osyǵan oraı halyqqa qyzmet kórsetýdiń sapasy aıtarlyqtaı artýy tıis.
«Halyqqa qyzmet kórsetýdiń sapasyn aıtarlyqtaı arttyrý jáne medısına qyzmetkerlerin osy iske yntalandyrýdyń joldary belgilendi. Osynyń bir sharasy retinde 2019 jyldyń 1 qańtarynan bastap aýrýlardy basqarýdyń jańa ádisterin engizgen ýchaskelik medısına qyzmetkerleriniń jalaqysy 20 paıyzǵa kezeń-kezeńimen ósirilmek. Bul úshin bıyl 5 mlrd teńge bólinedi», dedi Sh.Baımaǵambetov.
Suńǵat ÁLIPBAI,
«Egemen Qazaqstan»