Astanadaǵy ortasha aılyq nomınaldy jalaqy – 230 myń teńge. Astana qalasy Statıstıka departamentiniń jetekshisi mindetin atqarýshy Janar Serikbaeva bul derekke qatysty túsinikteme berdi.
Onyń aıtýynsha, bul sandar qalada resmı tirkelgen mekeme, ulttyq kompanııalar men mınıstrlikter jáne úlken kásiporyndar toqsan saıyn tapsyratyn statıstıkalyq taldaý nátıjeleri boıynsha (eńbek boıynsha esep) anyqtalady.
Statıstıka departamentiniń málimetinshe, Astanada 2019 jyldyń 1 qańtaryna deıin 73 myńnan asa zańdy tulǵa, fılıaldar men ókildikter jáne 98 myńǵa jýyq jeke kásipker tirkelgen.
«2018 jyldyń qańtar-qyrkúıek aılarynda Astanada bir qyzmetkerdiń ortasha aılyq nomınaldy jalaqysy 233163 teńgeni qurady. Bul derekter toqsan saıyn qalada tirkelgen kásiporyndar men zańdy tulǵalardan jınalatyn statıstıkalyq esepke negizdelgen. Ol esep 1-T dep atalatyn forma negizinde esepteledi. Ári qaraı bir qyzmetkerdiń ortasha eńbekaqysyn esepteımiz. Ol eseptelgen jalaqy qorynyń somasyn (laýazymdyq jalaqylar, qosymsha aqylar, ústeme aqylar, syıaqylar jáne yntalandyrýshy jáne ótemaqy sıpattaǵy ózge de tólemder) salyqtardy eskere otyryp, qyzmetkerlerdiń naqty sanyna jáne esepti kezeńdegi aılardyń sanyna bólý jolymen anyqtalady», dedi Janar Serikbaeva.
Sondaı-aq, ol Qazaqstannyń elordasynda barlyq iri kásiporyndardyń, ulttyq kompanııalardyń, mınıstrlikterdiń, shaǵyn jáne orta bıznes sýbektileriniń bas keńseleri bar ekenin eskerý qajet ekenin atap ótti.
Ortasha aılyq jalaqy týraly resmı statıstıkalyq málimetterdi stat.gov.kz saıtynan kórýge bolady.