Aqtóbede respýblıkanyń batys óńirlerin túgeldeı qamtıtyn aqparattyq-logıstıkalyq ortalyǵy (ALO) quryldy. Onyń tıimdiligi men artyqshylyǵy nede?
Birinshiden, jahandyq sıfrlandyrý elektrondy kommersııa naryǵyna jol ashty. Bul el ekonomıkasynyń basty bir býynyna aınalyp keledi. Sońǵy alty jyldyń ishinde elektrondy kommersııa rynogy 2,5 esege deıin ósti. Sondaı-aq bul úrdis poshta jóneltilimderi kóleminiń ósýine de alǵyshart qalady.
Osy oraıda «Qazposhta» AQ taıaý ýaqytta 35 mıllıon zattaı jóneltilimdi (posylka) dittegen jerine jetkizýdi josparlap otyr. Onyń 45 paıyzy el ishindegi úlesti quraıdy. Ekinshiden, jóneltilimdi jetkizý ýaqytyn qysqarta otyryp, elimizdiń batys óńirlerin qamtý úshin Qytaıdan jáne Reseıden Aqtóbege tikeleı áýe reısterin ashý joldary belgilendi. Qazirgi kezde elimizde poshta jóneltilimderiniń kólemi men aýqymy ájeptáýir óskendikten Almaty qalasyndaǵy aqparattyq-logıstıkalyq ortalyqqa túsetin salmaq pen júkteme óse túskeni de belgili bolyp otyr. Aqtóbedegi osy tektes jańa qurylym júktemeni azaıtýǵa jáne halyqaralyq poshta jóneltilimderiniń ýaqyty men jolyn ájeptáýir qysqartýǵa oń áserin tıgizbek. Bul ALO-nyń úshinshi artyqshylyǵy.
Tórtinshiden, aldaǵy ýaqytta temir jol magıstraldary baǵyttarynda arnaýly poshta vagondaryn paıdalaný tájirıbesi toqtatylmaq. Iаǵnı poshta bolashaqta elimizdegi taıaý jáne alys shetelderge áýe reısteri arqyly jetkiziledi. Al el ishinde bul maqsatta júırik avtokólikter tıimdi dep tabylǵan.
Aqtóbe aqparattyq-logıstıka ortalyǵy óńirler arasynda tuńǵysh ret paıdalanýǵa berilýimen erekshelenedi. Bul jóninen óndiristik óńir Almaty men Astana megopolısterine ǵana jol beredi. Aıtalyq buǵan deıin mundaǵy poshta suryptaý ýchaskesi kúnine 6000 jóneltilimdi júıege keltirip ázirlese, «Batys» jańa logıstıka ortalyǵynyń ashylýyna oraı bul kórsetkishti tórt esege deıin ulǵaıtýǵa múmkindik týdy. Onyń 40 paıyzy usaq paketter bolsa, 25 paıyzyn hattar quraıdy. 35 paıyzy – zattaı sálemdemeler.
Zamanaýı logıstıka men suryptaý ortalyǵynyń jalpy kólemi 3500 sharshy metrdi quraıdy. Onyń iske qosylýyna baılanysty 80 jańa jumys orny ashyldy. «Batys» búgingi zamanǵy qondyrǵylarmen jáne jańa sıfrly tehnıkalarmen tolyqtaı jabdyqtalǵan. Munda qaýipsizdik jáne beıne baqylaý júıeleri jumys isteıdi. Keshendi qurylym halyqaralyq jóneltilimderdi kidirtpeı jetkizýge múmkindik týǵyzady. Sondaı-aq iri ári salmaǵy aýyr poshta jóneltilimderin qabyldaýǵa, jóneltýge jáne tasymaldaýǵa negiz qalaıdy. Buǵan qosa «Fýlfılment» qyzmetin jolǵa qoıýǵa járdemdesedi. Atalǵan jańa termın qandaı túsinikti bildiredi? Biz bul saýaldy «Qazposhta» AQ Aqtóbe oblystyq fılıalynyń tóraǵasy Serik Berdenovke qoıǵan edik.
– «Fýlfılment» qyzmeti «Sıfrly Qazaqstan» memlekettik baǵdarlamasyn júzege asyrýǵa sáıkes «Qazposhta» júıesine engizilgen. Atalǵan joba elimizdiń aýmaǵynda elektrondyq kommersııa qyzmetin jappaı óristetýdi kózdeıdi. Iаǵnı «Fýlfılment» ortalyǵy degenimiz, turǵyndarǵa ınternet-dúkenniń keshendi qyzmetin usynady. Búginde Aqtóbedegi osy tektes ortalyq qajetti qondyrǵylarmen tolyq jabdyqtalǵan. Sonyń arqasynda jylda 160 myń ınternet-dúken jóneltilimderin retteý múmkindigi týdy. Bul rette bizge «AkRýno» JShS atalǵan aýqymdy jobany ázirleý men engizýge úlken kómegin tıgizdi, – dedi ol.
«Qazposhta» júıesine engizilgen jańa joba bıznes júrgizý úshin jaıly orta qalyptasýyna da áserin tıgizedi. Joba jetekshileri respýblıka boıynsha «Qazposhtanyń» 3500 bólimshesi bar ekenin eskergen jaǵdaıda ınternet-dúkenge arqa súıeıtin salalyq bıznes óte tıimdi ekenin alǵa tartady.
Temir QUSAIYN,
«Egemen Qazaqstan»
AQTО́BE