«Sırııadan elimizge qaıtarylǵan azamattardan qandaı da bir qaýip bar ma?» - degen suraqqa QR Syrtqy ister mınıstrliginde ótken baspasóz máslıhatynda QR Ulttyq qaýipsizdik komıtetiniń departament basshysy Baqytbek Rahymberdıev jaýap berdi.
«Bul operasııa birneshe aıǵa sozyldy. О́te kóp qıynshylyq boldy. Árıne, jan-jaqty máseleler tolyqqandy tekserildi. Kópshilikti lańkestik turǵydan «qaıtarylǵan azamattar jaǵynan qandaı da bir qaýip bar ma?» degen suraq mazalaıdy. Taǵy da aıtaıyn, ol jaǵynan bári de tekserildi. Qazirgi tańda qaıtarylǵan azamattardyń ishindegi 6 er kisi jáne 1 áıeldiń ústinen qylmystyq ister qozǵaldy. Osylar jáne qaıtarylǵan basqa azamattar terrorıstik áreketter turǵysynan tolyǵymen tekseriledi. Eger ondaı jaǵdaı dáleldense, árıne, qylmystyq jaýapkershilikke tartylady», - dedi Baqytbek Rahymberdıev.
Onyń aıtýynsha, Irak pen Aýǵanstannan da qazaqstandyqtar elge qaıtarylǵan.
«Ol jaqtardan da Qazaqstannyń birneshe azamaty qaıtarylǵan bolatyn. Olardyń ishinde tek 40 paıyzy ǵana qylmystyq jaýapkershilikke tartylǵan. Qalǵandaryna aldyn alý, ońaltý sharalary júrgizilgen. Sol úshin kópshilik ol týraly bile bermeıdi. Biraq, bizdiń oıymyzsha, qaıtarylǵan azamattardan ázirshe eshqandaı terrorıstik qaýip joq. Bul rette, eń basty másele - kishkentaı balalardy qaıtarý boldy. О́ıtkeni, qaıtarylǵandardyń basym kópshiligi - 1-5 jas aralyǵyndaǵy balalar», - dedi ol.