Qazaqstandyqtardyń Sırııadan qaıtarylýy birqatar halyqaralyq jańalyq agenttikteriniń nazaryn aýdartty. Solardyń biri – Fransııanyń «Frans 24» halyqaralyq jańalyq arnasy.
Qazaqstannyń qaýipsizdik qyzmetine silteme jasaı otyra, 2011 jyldan beri júzdegen otandasymyzdyń Sırııadaǵy áskerı toptardyń qataryn tolyqtyrǵanyn jazady.
Odan ári Elbasynyń «Osy jyldyń 6 qańtary 47 Qazaqstan azamaty, onyń ishinde 30 sábı Sırııadan elge qaıtaryldy. Endigi kezekte erkinen tys soǵysqa tartylǵandardyń balalaryn qaıtarýǵa tyrysamyz» degen málimdemesin jarııalaı otyryp, Qazaqstan 2017 jyldan beri Túrkııa, Reseı, Iran elderimen birlesip, Sırııa máselesi boıynsha birneshe kelissóz júrgizgenin aıtady. Astanadaǵy kelissózge Sırııadaǵy qarýly toptardyń ókilderi qatysty. Alaıda olardyń qatarynda Islam memleketiniń ókilderi bolmaǵanyn jazady.
Sonymen qatar «Sırııadaǵy áskerler sabynan myńdaǵan Ortalyq Azııa elderiniń, Kavkaz azamattaryn kezdestirýge bolady», deıdi besinshi memlekettiń jańalyq arnasy.
Soz sońynda 2011 jyly úkimetke qarsy narazylyq sebebinen týǵan azamattyq soǵys nátıjesinde 360 000 adam kóz jumǵanyn habarlaıdy.
Al Túrkııanyń Anadolý agenttigi Qazaqstan Respýblıkasynyń syrtqy ister mınıstrligi quqyq qorǵaý vedomstvolarynyń gýmanıtarlyq operasııasy nátıjesinde 47 azamatymyzdyń elge qaıtarylǵanyn habarlaǵan.
Sonymen qatar, Elbasynyń «urys aýmaǵynan qaıtarylǵan azamattarymyz ben balalarǵa kómektiń barlyq túri kórsetiledi. Osyndaı qıyn jaǵdaıǵa túsken kinásiz adamdar qutqarylǵanyna baqytty. Olar adaptasııadan ótip, medısınalyq kómek kórsetiledi» degen málimdemesin jarııalaǵan.
Túrik agenttigi habarlamasyn 2011 jyldan beri júzdegen qandastarymyzdyń qarýly toptarǵa qosylý maqsatynda elimizdi tárk etkenin, olardyń kóbi soǵysta qaza bolǵan aqparatpen támamdaıdy.