Jastar jylynyń alǵashqy aptasynda Astrahan aýdanyndaǵy Jaltyr stansııasynyń №2 orta mektebiniń bazasynda kir kóterý sportynan Aqmola oblysynyń chempıonaty ótkizildi. Jarysqa jasóspirimder men eresekter qatysyp, kúsh synasty.
Bul mektepte kir tasyn kóterý sportynan álemge tanymal birneshe sportshy túlep ushqan. Jarystyń osy jerde uıymdastyrylýy da osyndaı dástúrge baılanysty. Qazirgi kúni sańlaq sportshylardyń izin laıyqty jalǵastyryp kele jatqan úmitkerler az emes. Olar ár salmaq dárejesinde 16 jáne 24 kelilik kir tasyn urshyqsha úıirip, úzdik nátıjelerge qol jetkizdi.
–О́tken 2018 jyl Aqmola oblysynyń kir tasyn kóterýshi sportshylar úshin jaqsy jetistiktermen aıaqtaldy. Bıylǵy jastar jylynyń alǵashqy jarysynda bilikti bapker ári ustaz Baqtııar Jumabekovtyń juldyzdy shákirtiniń biri, álemniń 2 dúrkin chempıony Merýert Súleımenova da kúsh synasatyn bolady. Osy tóńirektegi Jarsýat aýylynyń arýy Merýertten ózge ini-sińlileri úlgi alady degen úmit bar,–deıdi jarystyń bas tóreshisi Sergeı Prohorov.
Tartysty ótken jarys barysynda Sandyqtaý aýdanynan Andreı Dýlın, Andreı Korj, Maksım Shnıd, Tatıana Ermolaeva jáne shalǵaıdaǵy Jarqaıyń jerinen Abylaı Qalıbek, Qýanysh Nurǵojın, Anatolıı Sheglovskıı jeńistiń bıik tuǵyryna kóterildi. Astrahan aýdanynyń birneshe óreni chempıon atanyp, júldeger boldy.
–Álem chempıonatynan keıin az-kem tynyǵyp, oblystyq jarysqa qatystym. Oblys rekordyn jańǵyrtyp, babymda ekendigimdi dáleldedim. Eń basty meje ústimizdegi jyly Qostanaıda ótetin álem chempıonatyna tyńǵylyqty daıyndalý. Sóıtip, álem birinshiligine joldama jeńip alý,–deıdi halyqaralyq dárejedegi sport sheberi Merýert Súleımenova.
Sporttyń osynaý túriniń aldaǵy bolashaqta Aqmola oblysynyń ár aımaǵynda qanat qaǵatynyna mamandar nyq senip artyp otyr.
Baıqal BAIÁDIL,
«Egemen Qazaqstan»
Aqmola oblysy