Elbasynyń áleýmettik salany jańǵyrtýǵa baǵyttalǵan 5 bastamasy halyqtyń turmys sapasyn jaqsartyp, ál-aýqatyn arttyrýdy kózdeıdi. Aýqymdy baǵdarlamada júktelgen maqsat-mindetter júıeli túrde júzege asý ústinde. Ásirese, shaǵyn nesıe kólemin ulǵaıtý máselesi ózin-ózi jumyspen qamtyǵan azamattarǵa mol múmkindik ashyp otyr.
Oblys ortalyǵyndaǵy jumyssyzdyq deńgeıi 3,9 prosent. О́tken jyldyń ózinde 2060 kókshetaýlyq turaqty jumysqa ornalasty. 139 adam kásibı daıyndyqqa jiberilse, 40 azamat jeńildetilgen nesıe rásimdep, óz isterin bastap ketti. Bul maqsatqa respýblıkalyq bıýdjetten 307 mıllıon teńge kóleminde qarjy baǵyttalyp otyr.
– Bıýdjetten 211 mıllıon teńge 900641 adamǵa tólemder tólendi, tabıǵı apattar kezinde zardap shekken 216 otbasyna 17,7 mıllıon teńge kómek kórsetildi. 281 múgedek adamdarǵa jeke baǵdarlama boıynsha qoldaý kórsetildi. Bul baǵytta jergilikti bıýdjetten 211 mıllıon 290 myń teńge mólsherinde qarajat bólindi,–deıdi qalalyq jumyspen qamtý jáne áleýmettik baǵdarlamalardy úılestirý bóliminiń jetekshisi Qalı Ahmetov.
Elbasy Nursultan Nazarbaev halyqtyń tabysy men turmys sapasyn arttyrý úshin áýeli bızneske qolaıly jaǵdaı jasaý týraly tapsyrǵan bolatyn. Osy maqsatta «Bıznestiń jol kartasy - 2020» memlekettik baǵdarlamasynyń qoldaný merzimi 2025 jylǵa deıin uzartylady. Atalǵan baǵdarlamany júıeli júzege asyrýǵa jyl saıyn respýblıkalyq bıýdjetten qosymsha 30 mıllıard teńge bólinbekshi. Bul 22 myńnan astam jumys ornyn ashyp, salyq túsimderin kóbeıtýge jáne ónim óndirý kólemin meılinshe ulǵaıtýǵa múmkindik beredi.
Aımaqta jumyssyz jáne jumyspen ishinara qamtylmaǵan halyqty eńbekpen belsendi qamtýdyń keshendi jospary qolǵa alynǵan. Oblys kóleminde jumyssyz júrgenderdi jáne ózin-ózi jumyspen qamtyǵandardy qysqa merzimdi oqý kýrsynan ótkizýge baılanysty 25 kolledj ben 6 oqý ortalyǵy jumys isteıdi. Tutastaı alǵanda, áleýmettik bastamada atap kórsetilgen aýqymdy jobalar júıeli túrde júzege asý ústinde.
Baıqal BAIÁDIL,
«Egemen Qazaqstan»
Aqmola oblysy