«Nur Otan» partııasy jas ónertapqyshtar arasynda ótkizgen respýblıkalyq «NURINTECH» ınnovasııalyq jobalar baıqaýynyń qorytyndysyn jarııalady. Soǵan oraı búgin «Astana Hub» halyqaralyq IT-startaptar tehnoparkinde baıqaý jeńimpazdary saltanatty túrde marapattaldy. Oǵan partııa Tóraǵasynyń Birinshi orynbasary Máýlen Áshimbaev, Parlament depýtattary jáne ınnovasııa salasyndaǵy mamandar qatysty.
Jas ǵalymdardy jeńisterimen quttyqtaǵan partııa Tóraǵasynyń Birinshi orynbasary olardyń ǵylymı jumystary laıyqty jalǵasyn taýyp, el damýyna óz úlesin qosatynyna senim bildirdi. Sondaı-aq Máýlen Áshimbaev Tórtinshi ónerkásiptik revolıýsııa jaǵdaıynda sıfrlandyrýdyń, ınnovasııanyń jáne jańa tehnologııanyń mańyzy zor ekenin, Elbasy osy salaǵa erekshe kóńil bólip, onyń jan-jaqty damýyna barlyq jaǵdaıdy jasap kele jatqanyn tilge tıek etti.
– Baıqaý Elbasy, «Nur Otan» partııasynyń Tóraǵasy Nursultan Nazarbaevtyń tikeleı tapsyrmasymen qolǵa alynǵan joba. Onyń basty maqsaty – talantty, bolashaǵynan úmit kúttiretin, ǵylym men ınnovasııada tyń ıdeıalardy qolǵa alyp, jumys istep júrgen jastarymyzdy qoldaý, olarǵa óz bastamalaryn tabysty júzege asyrýǵa jaǵdaı týǵyzý, – dedi Máýlen Áshimbaev.
Sonymen qatar ol marapattaý saltanatynyń «Astana Hub» IT-startaptar tehnoparkinde ótýi de tegin emes ekenin aıtty. Onyń aıtýynsha, Elbasy ashqan bul ortalyq elimizdegi ınnovasııa salasynyń mamandaryn bir arnaǵa toǵystyryp, olarǵa júıeli túrde qoldaý kórsetip, startaptaryn júzege asyrýǵa jol ashyp beretin alań bolyp tabylady. Ashylǵanyna kóp ýaqyt ótpese de «Astana Hub» óziniń tıimdiligin dáleldep úlgergen. Búginde munda 150-ge jýyq startap júzege asyrylýda.
– «NURINTECH» baıqaýynyń jeńimpazdaryn marapattaýdy osy alańda ótkizý arqyly jas novatorlarǵa «Astana Hub» alańyn kórsetip, onyń múmkindigimen tanystyrýdy maqsat tuttyq. Sondyqtan aldaǵy ýaqytta jastarymyz óz jobalaryn osy alańda ári qaraı damytyp, keńeıtip, keshendi túrde iske asyrady dep senemiz, – degen Máýlen Áshimbaev jyl saıyn baıqaýǵa qatysýshylardyń qatary ósip kele jatqanyn jetkizdi.
О́z sózinde «Nur Otan» partııasy Tóraǵasy Birinshi orynbasary baıqaýǵa qatysqan jumystardyń barlyǵy elimiz úshin mańyzy zor jobalar ekenin de atap ótti. Sondyqtan ol keleshekte atalǵan jobalardyń tek Qazaqstanda ǵana emes, álemniń ózge elderinde de tanymal bolatyn ǵylymı jańalyqtar men ınnovasııalyq jetistikterge qol jetkizýine tilektestigin bildirdi.
Sondaı-aq Máýlen Áshimbaev qazirgi tańda mundaı bastamalardyń elimiz úshin bereri mol ekenin aıtyp ótti.
– Búginde elimizde Elbasymyzdyń bastamasymen Qazaqstannyń Úshinshi jańǵyrýy júzege asyrylyp jatyr. Bul keshendi baǵdarlamanyń negizinde elimizdiń tehnologııalyq, ınnovasııalyq jáne údemeli damýy kózdelgen. Tehnologııalyq damýdyń negizgi kilti ǵylymı jańalyqtar men ınnovasııa ekeni sózsiz. Sondyqtan qazirgi tańda osy baǵyttaǵy bastamalardy, startaptardy, ǵylymı jáne IT-jobalardy qoldaýdyń mańyzy zor. Osy turǵydan kelgende, partııamyzdyń «NURINTECH» baıqaýynyń mańyzy zor, – dedi partııa Tóraǵasynyń Birinshi orynbasary.
Odan bólek, Máýlen Áshimbaev jastarǵa óz kúshterine senip, oılary men ıdeıalaryn júzege asyrý jolynda tabandylyq tanytyp, armanyna jetý úshin aıanbaı eńbek etý kerektigin aıtty.
– Biz qazir Google, Amazon, Apple, Microsoft, Tesla, Alibaba sııaqty iri ınnovasııalyq kompanııalardyń ónimderin qoldanamyz. Olar da arman men maqsattardyń jáne tabandy eńbek pen qajyr-qaırattyń jemisi. Olardyń negizin qalaýshylar qoldarynda múmkindik bolmasa da óz jobalarynyń jemis beretinine sene bildi. Sondyqtan búgingideı tabysqa jetip otyr. Sol sebepti sizder de óz múmkindikterińizge senip, eńbek etýlerińiz kerek. Sizderge Elbasy da úlken senim artyp, «Astana Hub» sııaqty startaptar alańyn ashyp berdi. Memleket basshysynyń tapsyrmasymen «NURINTECH» sııaqty baıqaýlar da kóptep uıymdastyryla bastady. Endi qazaqstandyq jastar Elbasynyń osy senimin aqtap, ınnovasııa jolynda aıanbaı jumys isteýleri kerek, – dedi Máýlen Áshimbaev.
О́z kezeginde jas ónertapqyshtardy Májilis depýtattary Albert Raý men Gennadıı Shıpovskıh, Eńbek jáne halyqty áleýmettik qorǵaý vıse-mınıstri Nurjan Áltaev, «Astana Hub» halyqaralyq IT-startaptar tehnoparkiniń dırektory Ádilet Nurǵojın, Ulttyq bıotehnologııalyq ortalyqtyń bas dırektory Erlan Ramanqulov jáne taǵy basqa belgili mamandar quttyqtap, ıgi tilekterin jetkizdi.
Bıyl qatarynan úshinshi ret uıymdastyrylǵan is-shara «Jas Otan» Jastar qanatynyń uıytqy bolýymen ótkizildi. Nátıjesinde úsh atalym boıynsha jeńimpazdar men júldegerler anyqtaldy.
Atap aıtqanda, «Áleýmettik mańyzdy ınnovasııalar» atalymy boıynsha qyzylordalyq Nursultan Pirimbetov jeńimpaz dep tanyldy. Ol baıqaýǵa qaladaǵy keptelisti azaıtý úshin kólikti jalǵa alýǵa arnalǵan mobıldi qosymshasyn usynǵan. Bul atalymda múgedekter arbasyn avtomattandyrý qondyrǵysyn oılap tapqan astanalyq Dýlat Ámirjan 2-oryn alsa, úzdik úshtikti kózi nashar kóretinder úshin robottandyrylǵan taıaq jasap shyqqan pavlodarlyq Álıhan Rahmetov túıindedi.
Al D.Serikbaev atyndaǵy Shyǵys Qazaqstan memlekettik tehnıkalyq ýnıversıtetiniń jas ǵalymdary tantaldan jasalǵan otandyq medısınalyq ımplanttardyń úlgisin oılap taýyp, «Úzdik jas ǵalym» atalymynda jeńiske jetti. Olardyń sózine qaraǵanda, qazir úlgi klınıkaǵa deıingi synaqtan ótýde. Eger synaq nátıjeleri sátti bolsa, bul qurylǵylar Qazaqstan ǵana emes Reseıdiń de naryǵynda suranysqa ıe bolmaq. Bul atalymda ózin-ózi retteıtin jylytý kabelin daıyndaǵan almatylyq Nurqadyr Mansurov 2-oryn aldy. Al tozǵan jáne tuzdalǵan jerlerdi qalpyna keltirýge arnalǵan bıomelıorant oılap tapqan Jambyl oblysynyń týmasy Dáýlet Egemberdıev 3-orynǵa taban tiredi.
Byltyr jobada jeńiske jetip, robot tehnıkasynan halyqaralyq jarystardyń jeńimpazy atanǵan almatylyq oqýshy Lıýbov Dýdchenkonyń týrızmdi damytýǵa baǵyttalǵan «joARney» qosymshasy «Jastardyń ınnovasııalyq jobasy» nomınasııasy boıynsha top jardy. Mobıldi qosymsha Almaty qalasynda taýǵa shyqqysy kelgen týrısterge taýly aımaqtyń modelin tolyqqandy shynaıylyq (augmented reality) formatynda kórsetedi.
Kólik jaqyndaǵanda qulaqqaptyń dybys deńgeıin ózi tómendetetin qosymsha jasap shyqqan almatylyq Jáńgir Sıranov atalǵan nomınasııa boıynsha 2-oryn alsa, jaryqtyń kómegi arqyly derekterdi berý jobasymen baıqaýǵa qatysqan atyraýlyq Arsenıı Kan úshinshi orynnan kórindi.
Barlyq jeńimpazdar men júldegerlerge qarjylaı syılyqtar tabys etildi. Naqty aıtqanda, 1-oryn alǵan jas ǵalymdarǵa 1 mıllıon teńge syıaqy taǵaıyndalsa, 2-oryn ıegerlerine – 500 myń, 3-oryn alǵan ónertapqyshtarǵa 250 myń teńgeden berildi. Baıqaýdyń jalpy júlde qory 5 mıllıon teńgeni qurady. Odan bólek, qostanaılyq 11-synyp oqýshysy Petr Shılov baıqaýdyń arnaıy júldesi – Halyqaralyq aqparattyq tehnologııalar ýnıversıtetiniń grantyn utyp aldy.
Aıta keteıik, baıqaýǵa qatysýǵa 2018 jyldyń qazan aıynan bastap elimizdiń barlyq óńirinen 1000-nan astam ótinim kelip túsken. Komıssııa músheleri fınalǵa ótken 30 jumystyń ishinen ekologııa, robot tehnıkasy, jasandy ıntellekt, balamaly qýat kózderi, jasyl energetıka, ónerkásip, IT, medısına, hımııa, bıologııa, farmasevtıka, jol qozǵalysynyń qaýipsizdigi salalaryndaǵy eń úzdik jobalardy tańdap, úzdik dep tanydy.