Úısiz adamyń kúıi de bolmaıtyndyǵy belgili. Biraq, «úıdegi kóńildi bazardaǵy naryq buzady» degendeı, oıyndaǵysyndaı páter alýǵa árkimniń qoly jete bermeıdi. Memlekettik baǵdarlamalar arqyly jeńil nesıe alǵanymen tabysy kún kórisine zorǵa jetip júrgenderge «aspannan kıiz jaýsa da, kedeıge ultaraqtyq tımeıtinniń» keri keledi de turady.
Jaqynda Qazaqstan Respýblıkasynyń Statıstıka jónindegi komıteti elimizdegi arzan jáne qymbat páterlerdiń reıtıngin shyǵardy. Ádettegideı, eń qymbat páterler Astana, Almaty jáne Atyraý qalalaryna tıesili eken.
Qymbat qalalarda turatyn turǵyndar úshin mundaǵy úılerdiń ár sharshy metri úsh júz qyryq myń teńgege deıin jetedi.
Al, eń arzan úıler Taraz qalasynyń enshisinde eken. Munda turǵyndar sharshysyna 116 myń teńgeni shytyrlatyp sanap berip, páterge qol jetkize alady.
Odan keıin arzan páterler Petropavl men Qyzylorda qalasynda shamalas dese bolady. Qyzylordanyń ortalyǵynda úıdiń bir sharshy metri ortasha 141 myń teńgege parapar. Osyǵan qarap Qyzylordada memlekettik baǵdarlamalar jaqsy jumys jasap jatqandyǵyn anyq baıqaýǵa bolady. Búginde Syrdarııanyń sol jaǵalaýynda salynyp jatqan úılerdiń alǵashqy kezegi paıdalanýǵa daıyn. Osyǵan baılanysty ótken jyldyń sońynda «Turǵyn úı qurylys jınaq banki» «О́z úıim» baǵdarlamasy boıynsha konkýrs jarııalaǵan bolatyn. Baıqaý sharty boıynsha byltyrǵy jyldyń 24 jeltoqsany men bıylǵy jyldyń 14 qańtary aralyǵynda sol jaǵalaýdaǵy eki úsh bólmeli úılerge salym salǵandar aıtýly jeńildikke ıe bolady.
– «О́z úıim» baǵdarlamasy 2015 jyldan bastap júzege asyp keledi. Ádepkide baǵdarlama talaby boıynsha alǵashqy jarna úı baǵasynyń 30 prosentin jınaqtaý jáne nesıeniń jyldyq ústemesi 8,5 prosent bolsa, ótken jyldan bastap alǵashqy jarna 20 prosent jáne nesıe 7 prosentpen berile bastady. Baǵdarlamanyń bir tıimdi tusy kez kelgen adam qatysa alatyndyǵynda. Eń bastysy, tólem qabiletin rastasa boldy. Atynda jyljymaıtyn múlik bolǵany da kedergi emes jáne kez kelgen qaladan úı alýǵa múmkindigi bar,– deıdi bank fılıalynyń orynbasary Ilııas Jurynov.
Búginde paıdalanýǵa beriletin 115 páterdi alýǵa bes júzden astam salymshy báıgege túsken eken. Baıqaý sharty boıynsha eń birinshi kezekte páter alatyndar kompıýter arqyly avtomatty túrde anyqtalady. Páter alý úshin eń kóp qarjy quıǵan salymshylarǵa basymdylyq beriledi. Bul degenińiz, eshkimge daý týdyrmaıtyn qısyn.
«О́z úıim» baǵdarlamasy 14 jylǵa nesıe esebimen beriledi. Mundaǵy artyqshylyq, alǵashqy segiz jylda nesıeni 7 paıyzben óteseńiz, sońǵy alty jylda 3,8 paıyzben tóleýge múmkindik alasyz.
Iаǵnı, tólem somasy 67 myń 800 teńge men 49 myń 863 teńge aralyǵynda bolyp, osy merzimde úsh bólmeli úıge qol jetkize alasyz. Almaty men Astana qalasynda úsh bólmeli úıdi jaldaýǵa pátershi júz myń teńgeden artyq tóleıtinin eskerseńiz, tegin tústi deýge de bolatyn shyǵar. О́ıtkeni, páter jaldap turǵan adam on jyl osy qarjyny úzbeı tólep tursa da jaldamaly páter oǵan tıesili emes. Al, siz ózińizdiń jekemenshik baspanańyz úshin ter tógip jatyrsyz.
Sonymen qatar, «Turǵyn úı qurylys banki» fılıal dırektorynyń orynbasary Ilııas Jurynov Elordanynyń 20 jyldyǵy, Qyzylorda qalasynyń 200 jyldyq mereıtoılaryna baılanysty sol jaǵalaýdaǵy alǵashqy úılerdiń sharshy metri 120 000 teńgeden sanalyp jatqandyǵyn aıtady.
Páter muqtajdyǵyn tartqan qyzylordalyq turǵyndar «Nurly jer» baǵdarlamasy boıynsha da bir sharshy metri - 120 000 teńge bolatyn jáńa úılerge qol jetkizip jatyr. Osyndaǵy «Nurly jer» baǵdarlamasyna qatysqan qurylys kompanııalaryna «Damý» qory sýbsıdııa bólip otyr.
Sonyń biri «Sát servıs» JShS-i qurylys kompanııasy. Seriktestiktiń dırektorynyń orynbasary Nurlan Sádibekov «Nurly jer» baǵdarlamasy arqyly «Damý» qorynan jeti paıyzben nesıe alyp, alǵashqy úılerdi paıdalanýǵa tapsyryp jatyrmyz. Memlekettik qoldaý otandyq kásipkerlikti qanattandyryp otyr. Ákimdikpen bastapqy kelisim boıynsha úıdiń sharshy metrin 120 000 teńgeden bekittik, endi sol údeden shyǵyp otyrmyz. Halyqtyń qýanyshy bizge de ortaq. Kómegimiz tıip jatqandyǵy bizdi de qýandyrady» deıdi.
«Damý» kásipkerlikti damytý qory AQ aımaqtayq dırektory Almas Dastanov bul baǵdarlamanyń 2017-2019 jyldarǵa arnalǵandyǵyn eske salǵan. «Damý» qory bir jyl aralyǵynda 7 paıyzdyq sýbsıdııamen úsh jylǵa toǵyz qurylys kompanııasymen kelisim shartqa otyrǵan eken. Osy bólingen 1,4 mıllıard teńgege qurylys kompanııalary 34 myń sharshy metr turǵyn úı salady.
Búginde Qyzylorda oblysy «Nurly jer» baǵdarlamasyn iske asyrýda respýblıkadaǵy úshtikte keledi. Qalada qazir 12 qabatty turǵyn úıdiń qurylysy aıaqtalǵan.
Iаǵnı, jaqyn kúnderde 560 páterde qonys toıyn toılanady. Memlekettik baǵdarlamalar osylaısha tátti jemisin jegizip jatyr.
Baqtııar TAIJAN,
«Egemen Qazaqstan»
QYZYLORDA OBLYSY