«Washington Post» gazeti Qytaı úkimeti 2000 etnıkalyq qazaqqa Qytaı azamattyǵynan bas tartyp, memleketten kóshýge ruqsat bergenin habarlady.
Syrtqy ister mınıstrliginiń baspasóz qyzmeti AQSh gazetine bergen jaýabynda 2000 qazaqqa Qytaıdan ketýge ruqsat berilgenin rastady. Olar Qazaqstan azamattyǵyn alýǵa ótinish bere alatynyn nemese Qazaqstanǵa kelisimen turaqty turǵyn-jaı alýǵa múmkindigi bar ekenin jetkizgen.
«Washington Post» málimetine saı, qazaq dıplomattary Shyńjańdaǵy otandastarymyzdy qorǵaý maqsatynda birqatar jumys júrgizgen. Gazetke jaýap jazǵan Syrtqy ister mınıstrliginiń ókilderi qarasha aıynda 29 azamatymyzdyń Qytaıda qamaýǵa alynǵanyn, olardyń 15-i bosatylǵanyn jáne elge qaıtýǵa ruqsat alǵanyn aıtqan.
Sonymen qatar basylym joldasy men eki balasyn eki jyl kórmegen 23 jastaǵy Gýlı esimdi qandasymyzdyń byltyr shildede Shyńjańǵa qaıtýǵa múmkindik alǵanyn jazady.
Gýlıdiń: «Qazaqstanǵa endi bara almaımyn dep ýaıymdaıtynmyn. Balalarymdy kórmeımin be degen kúdik te boldy. Barlyq úmitim úzilgen-di» degen sózderin keltiredi.
Amerıkalyqtarmen suhbatqa kelisken taǵy bir qandasymyz – inisiniń lagerden bosatylǵanyn, biraq Qytaıdan kete almaı júrgenin estigen Ábdiǵazy Erǵazy «Otbasymdy Qazaqstanǵa alyp kelýdiń jolyn izdep júrmin» degen.
Svetlana ǴALYMJANQYZY,
«Egemen Qazaqstan»