Memlekettik qyzmetshiniń óz mindetine salǵyrt qaraýynyń saldarynan shaǵyn jáne orta bıznes ókilderiniń zardap shegetini jaıly az jazylmady. Alaıda, istiń túıinin zań sheńberinde sheshýdiń ornyna meılinshe sozyp, nemquraıly qaraýdan arylmaǵan sheneýnikter qatary azaımaı otyr.
Máselen, Taldyqorǵan qalasynyń sáýlet jáne qala qurylysy bóliminiń basshysy men qatardaǵy qyzmetkerleri jeke kásipkerdiń ótinishine birneshe aı boıy qulaq aspaı, zańmen belgilengen tártip boıynsha jaýap bermeı kelipti. Jeke kásipker Janar Imanǵalıeva ótken jyldyń maýsym aıynda qalalyq sáýlet jáne qala qurylysy bólimine ıeligindegi páterin turǵyn úı qorynan shyǵaryp, kommersııalyq nysanǵa aýystyrý boıynsha ótinish bergen. Jeke kásipker jeke páterin dárihana etip qaıta jabdyqtap, saýda nysanyna aınaldyrýdy maqsat tutady. О́tinishke saı tıisti qujattaryn tolyq ótkizgen. Alaıda memlekettik organ memlekettik qyzmet kórsetý standartyn buzyp, hatqa birneshe aı ótken soń ǵana ótinishti qanaǵattandyrmaý jóninde jaýap beredi.
Amaly taýsylǵan kásipker quqyqtyq kómek alý maqsatynda Kásipkerler palatasyna júginýge májbúr boldy. О́z kezeginde «atamekendikter» qalalyq sáýlet jáne qala qurylys bólimi qyzmetiniń zańdylyǵyn anyqtaý maqsatynda Memlekettik qyzmet isteri jáne sybaılas jemqorlyqqa qarsy is-qımyl agenttiginiń Almaty oblysy boıynsha departamentine hat joldaıdy. Al, departament ókilderi bólimge jospardan tys tekserý jumystaryn júrgizdi.
- Bólim basshysy «Qazaqstan Respýblıkasyndaǵy sáýlet, qala qurylysy jáne qurylys qyzmeti týraly» Zańynyń 60-baby 1-tarmaǵyna sáıkes, egjeı-tegjeıli josparlaý jobasyna súıenip turǵyn úı qorynyń fýnksıonaldyq maqsatyn, kommersııalyq nysanǵa ózgertýge, ıaǵnı dárihanǵa aýystyrýǵa ruqsat berýden bas tartqan. Biraq, bólim basshysy shyǵarǵan sheshimdi Investısııalar jáne damý mınıstrliginiń Qurylys jáne turǵyn úı-kommýnaldyq sharýashylyq isteri komıteti negizsiz dep tapty. Zań talaptaryn oryndamaǵany úshin bólim basshysy Anarqulov Murat «Ákimshilik quqyq buzýshylyq týraly» Kodeksiniń 465-babynyń 2-tarmaǵyna sáıkes ákimshilik jaýapkershilikke tartyldy, - deıdi oqıǵaǵa quqyqytyq baǵa bergen Kásipkerler palatasynyń sarapshysy Aqbota Abısheva.
Iаǵnı, sáýlet jáne qala qurylys bólimi silteme jasaǵan zań normasy boıynsha turǵyn úı qorynynyń fýnksıonaldyq maqsatyn, kommersııalyq nysanǵa ózgerýge tyıym salý kórsetilmegeni anyqtaldy. Sonymen birge, Kásipkerler palatasy men Memlekettik qyzmet isteri jáne sybaılas jemqorlyqqa qarsy is-qımyl agenttigi departamentiniń aralasýynan keıin ǵana kásipkerge bólim ókilderiniń 115 kúnge keshiktirilip jaýap bergeni belgili boldy. Jaýap hatynda memlekettik qyzmetterdi kórsetý tártibi týraly tolyq aqparat usynylmaýyna baılanysty qalalyq bólimniń jetekshi mamanyna «eskertý» túrinde tártiptik jaza qoldanyldy. Jalpy, Memlekettik qyzmet kórsetý standartyna sáıkes, ótinishi bildirgen azamattardyń hatyna jaýap berý merzimi 15 jumys kúnnen aspaýy kerek bolatyn.
Qalmahanbet MUQAMETQALI,
«Egemen Qazaqstan»
Almaty oblysy