Syrtqy ister mınıstri Beıbit Atamqulov Túrki Akademııasynyń Prezıdenti, professor Darhan Qydyrálimen kezdesti jáne kezdesý barysynda taraptar Túrki Akademııasy qyzmetiniń 2018 jylǵy qorytyndylaryn talqylap, bolashaqtaǵy yntymaqtastyqtyń perspektıvalyq baǵdarlaryn bekitti dep habarlaıdy Syrtqy ister mınıstrliginiń baspasóz qyzmeti.
Taraptar 2019 jylda ótkizýge josparlanǵan Túrkitanýshylardyń dúnıejúzilik kongresine daıyndyq jumystarynyń barysyn talqyǵa saldy.
Suhbat barysynda aıqyndalǵandaı, Túrkitanýshylardyń dúnıejúzilik kongresi barsha túrki álemine mańyzy zor oqıǵa bolyp, dúnıejúzilik túrkitanýdyń qaıta órkendeýine jáne osy ǵylymnyń aǵymdaǵy kúıin, jetistikterin, máseleleri men perspektıvalary tereń saraptalyp, jańa kózqarastan ótkizýge orasan zor yqpal etedi.
B. Atamqulov túrki yntymaqtastyǵynyń damýy jańa bir kezeńinde ótip jatqanyn jáne Memleket basshysy túrki ıntegrasııasyna óte mańyzdy mán beretinin atap ótti. «Túrki halyqtarynyń arasynda baýyrlas qatynastardy nyǵaıtý men túrkitaný ǵylymyn túrki órkenıetiniń jetekshisi retinde damytý, sondaı-aq Prezıdent Nursultan Nazarbaevtyń «Uly dalanyń jeti qyry» atty baǵdarlamalyq maqalasynda bekitilgen qaǵıdattardy júzege asyrý qajettilikterin eskere kele, mınıstrlik osy suraqtarǵa zor nazaryn aýdaratynyn jáne josparlanǵan is-sharalardy uıymdastyrý men ótkizýde jan-jaqty qolǵabys kórsetedi» - dep sendirdi mınıstr.
D. Qydyráli Syrtqy ister mınıstrligi tarapynan Akademııa qyzmetine kórsetiletin qolǵabys úshin zor alǵysyn bildirdi. Kezdesý sheńberinde ol 2019 jyldyń ortasynda IýNESKO shtab-páterinde (Parıj q.) Túrki Akademııasyna múshe-memleketter ǵalymdarynyń qatysýymen ótetin «Uly dala: mádenı mura men dúnıejúzilik tarıhyndaǵy róli» atty is-shara jóninde aqparat berdi.
Túrki Akademııasy - qoǵamdyq-gýmanıtarlyq ǵylymdar salasy boıynsha dúnıejúzilik deńgeıde keshendi túrkologııalyq zertteýlerdi júıeli túrde júrgizip otyrǵan ǵylymı ortalyq jáne qazirgi zamanǵy memleketaralyq jáne etnosaralyq ıntegrasııa jaǵdaıynda túrkitaný ǵylymynyń birden-bir úılestirýshisi. Shtab-páteri Astana qalasynda ornalasqan.