Qyzylordalyq bir jasqa endi tolǵan Qasym-Jomart týǵan kúninde jaqsy syı aldy.
Balaqaı Qasym-Jomartty Parlament Senatynyń tóraǵasy Qasym-Jomart Toqaev týǵan kúnimen arnaıy quttyqtap, syılyq jiberdi.
Ony kishkentaı búldirshinge «Nur Otan» partııasy Qyzylorda oblystyq fılıaly tóraǵasynyń orynbasary Erjan Baıtiles tabys etti.
Medısına salasynyń ardageri Úsen Maqajanuly byltyr dúnıege kelgen on birinshi nemeresiniń esimin Qasym-Jomart dep qoıǵan eken.
- Qaı ata-ananyń da eń úlken qýanyshy balalary, - deıdi Úsen Maqajanuly. - Nemeremizge yrymdap qazaqtyń memleket jáne qoǵam qaıratkeri Qasym-Jomart atasynyń nyspysyn qoıdyq. Toqaev - Qazaqstan Táýelsizdigin ornyqtyrýǵa, eldiń bolashaǵyn kemel etýge qyzmet etip júrgen el aǵasy. Sol atasyndaı bolyp ósip, Otanymyzdyń bir keregine kirpish bolyp qalanyp jatsa degen nıet ústindemiz.
Kishkentaı Qasym-Jomart úshin úlken Qasym-Jomart atasynyń syılyǵy aldaǵy ómirinde aıtýly oqıǵa bolary sózsiz.
Baqtııar TAIJAN,
«Egemen Qazaqstan»
Qyzylorda oblysy