Atyraýdaǵy Balyqshy aýyldyq okrýginiń 229 turǵyny 2008 jyly jer telimin alý kezegine turǵan. Biraq ákimdikte bolǵan órttiń saldarynan barlyq qujattar joıylyp ketti. Bul jaǵdaı turǵyndardyń alańdaýshylyǵyn týdyrǵan edi.
Oblys ortalyǵy men onyń mańyndaǵy eldi mekenderdiń turǵyndarynyń jer kezegine tirkelgeni elektrondy jýrnalda saqtalyp qalypty, sonyń arqasynda barlyq joıylǵan tizimder qalpyna keltirildi. Atyraý qalasy ákimdiginiń baspasóz qyzmeti bergen málimetke súıensek, ótken jyldyń sońynda osy máselege baılanysty arnaıy komıssııa qurylǵan.
- Komıssııa otyrysynda Balyqshy aýyldyq okrýginiń 229 turǵynynyń konstıtýsııalyq quqyǵyn qalpyna keltirý týraly sheshim qabyldandy. Jer kezegine tirkelgender www.atyrau.gov.kz saıtyndaǵy arnaıy bólimge kirip, JSN engizý arqyly kezekterin anyqtaı alady,-deıdi qalalyq jer qatynastary bóliminiń basshysy Naýryzbek Qumarov.
«Sıfrly Qazaqstan» memlekettik baǵdarlamasy aıasynda Atyraý qalasynyń jáne onyń mańyndaǵy aýyldardyń 86 myń turǵyny jer telimin alý kezegin ınternet arqyly bilýlerine bolady. О́tken jyly Atyraý qalasy ákimdigi 2003-2004 jyldary ótinim tapsyrǵan 480 adamǵa jer telimin berdi. «Nurly jer» baǵdarlamasy boıynsha 241 ótinim túsken. Naýryzbek Qumarov jer telimi qatań tártippen beriletinin aıtady.
Baqytgúl BABASh,
«Egemen Qazaqstan»
Atyraý oblysy