Búgin Aqordada Elbasy Nursultan Nazarbaev birqatar shetel Elshisinen senim gramotasyn qabyldady. Bul týraly QazAqparat HAA habarlady.
Atap aıtqanda, Memleket basshysyna Vetnam Sosıalıstik Respýblıkasynyń Elshisi Ngýen Thı Hong Oan, Horvatııa Respýblıkasynyń Elshisi Refık Shabanovıch, Japonııa Elshisi Tasýhıko Kasaı, Cheh Respýblıkasynyń Elshisi Rýdolf Gıkl, Tájikstan Respýblıkasynyń Elshisi Haırýllo Ibodzoda senim gramotasyn tabystady.
«Búgin senim gramotalaryn tapsyrýǵa arnalǵan saltanatty rásimge qosh keldińizder. Barshańyzdy Qazaqstandaǵy dıplomatııalyq qyzmetterińizdiń bastalýymen shyn júregimmen quttyqtaımyn. Sizderdiń qyzmetterińiz Qazaqstandaǵy mańyzdy reformalardyń júzege asyrylý kezeńimen tuspa-tus kelip otyr. Bizdiń 2050 jylǵa deıingi baǵdarlamamyzdy oryndaý úshin jappaı jumys istep jatyrmyz. Biz Táýelsiz el boldyq. Endi bizdiń maqsatymyz - álemdegi ozyq damyǵan 30 eldiń qataryna qosylý» dedi Elshilerge sóz arnaǵan Qazaqstan Prezıdenti.
Memleket basshysy Qazaqstannyń keleshegi zamanaýı tehnologııany jete meńgergen óskeleń urpaqtyń qolynda ekendigin basa aıtty. «Biz saýatty, búgingi zamanǵa saı urpaq tárbıeledik. Osyndaı jas býyn ókilderin qoldaý maqsatymen bıylǵy jyl Qazaqstanda Jastar jyly dep jarııalandy. Bul bastamanyń aıasynda olardy sapaly bilimmen, jumyspen, baspanamen qamtamasyz etý sharalary qolǵa alyndy. Sonymen qatar jastardyń básekege qabiletti azamat bolyp qalyptasýyna jol ashamyz» dedi Elbasy.
QR Prezıdenti halyqtyń áleýmettik jaǵdaıyn jaqsartyp, kásipkerlikti damytý úshin birqatar memlekettik baǵdarlamalar qabyldanǵanyn atap ótti. Sonyń nátıjesinde Doing Business-tiń reıtınginde Qazaqstan 190 eldiń ishinde 28 orynǵa ıe boldy.
«El ekonomıkasyn odan ary damytý úshin shetel ınvestısııasyn tartý mańyzdy mindet sanalady. Táýelsizdik jyldarynyń ishinde bizdiń júrgizgen saıasatymyzdyń arqasynda elimizge júzdegen mlrd dollar tikeleı ınvestısııa keldi. Ol bizdiń ekonomıkamyzdy kóterýge óziniń septigin tıgizdi. Syrtqy ister mınıstrliginiń quzireti qazirgi ýaqytta keńeıip, oǵan sheteldik ınvestısııa tartý, jańa eksporttyq baǵyttardy aıqyndaý máseleleri júkteldi. Sizderdi Qazaqstandaǵy áriptesterińizben birlesip, atalǵan baǵyttarda ózara is-qımyldy jandandyrýǵa shaqyramyn» dedi Nursultan Nazarbaev.