«Nurly jer» baǵdarlamasy boıynsha baspana alýǵa nıetti 28 myń kóp balaly otbasy tirkelgen. Bul sanatqa tórtten kóp balasy bar otbasylar kirip otyr. Byltyr elimizde bul baǵdarlama boıynsha osy sanattylarǵa 700 páter berilipti. Osy jaıynda keshe Úkimettiń baspasóz ortalyǵynda ótken jıynda Indýstrııa jáne ınfraqurylymdyq damý mınıstri Jeńis Qasymbek aıtty.
Mınıstrden turmysy tómen otbasylarynyń baspana alý múmkindikteri týraly suraǵan edik. Jeńis Qasymbektiń aıtýynsha, 2018 jyly «Nurly jer» memlekettik baǵdarlamasy rekordtyq kórsetkish ornatyp, 12,5 mln sharshy metr jańa turǵyn úı paıdalanýǵa berilipti. Elimizde 113 myńnan astam otbasy ózderiniń turǵyn úı jaǵdaılaryn jaqsartsa, sonyń ishinde 14 myńnan astam otbasy memlekettik qarajat esebinen arendalyq jáne nesıelik baspanamen qamtamasyz etilgen. Áleýmettik jaǵynan az qamtylǵan, múmkindigi shekteýli otbasylarǵa 4 myń páter berilse, sonyń 700-i kóp balaly jandarǵa tıesili. Bıyl jergilikti ákimdikterge qosymsha arendalyq baspanalar úshin 10 mlrd teńge bólinbek. Oǵan qosa, «7-20-25» ıpotekalyq baǵdarlamasy jáne «Turǵyn úı-qurylys jınaq bankiniń» salymshylaryna alǵashqy jarnany tóleý úshin sertıfıkat berý kózdelgen. Aldaǵy ýaqytta bul jeńildikterge kóp balaly otbasylar da ilinedi dep sendirdi mınıstr.
− Baspana alýǵa alǵashqy jarnany tóleý úshin beriletin sertıfıkattyń eki túri bar. Birinshisi, ákimdikter arqyly beriletin qaıtarymsyz negizdegi qarajat. Mysaly, «7-20-25» baǵdarlamasynyń alǵashqy jarnasynyń jartysyn sol sertıfıkat arqyly tóleýge bolady. Bir eskeretini, bul qarajat kólemi ár oblystyń bıýdjetine baılanysty ártúrli bolady. Ekinshisi, 10-15 jyldan keıin qaıtarýǵa arnalǵan sertıfıkat. Qazir tıisti zańǵa ózgerister engizilýde. Aldaǵy 2-3 aıda bul usynystar júzege asady, – dedi J.Qasymbek.
Taıaýda ótken Úkimettiń keńeıtilgen otyrysynda Memleket basshysy óńiraralyq ınfraqurylymdy júıeli túrde damytýdy tapsyrǵan bolatyn. J.Qasymbektiń aıtýynsha, Prezıdent tapsyrmasyn oryndaý maqsatynda byltyrdan bastap jergilikti jeli joldaryn jóndeýge bólinetin qarajat 2 ese ulǵaıtylyp, 150 mlrd teńgege jetti. Buǵan deıin elimizde 4 myńnan astam avtojol jóndeldi. 2025 jylǵa qaraı jergilikti joldardyń 85-90 paıyzy jaqsy jáne qanaǵattanarlyq jaǵdaıda bolady dep kútilýde. Mınıstr keltirgen aqparǵa súıensek, joldardy aqyly etý júıelerin iske asyrý jalǵasýda. Qazirgi tańda jalpy uzyndyǵy 471 shaqyrym bolatyn Almaty – Qorǵas, Almaty – Qapshaǵaı jáne Astana – Temirtaý jol ýchaskelerinde aqy alý bastaldy. Mınıstrdiń aıtýynsha, eki jyl ishinde taǵy 5,5 myń shaqyrym joldy aqy tóleý júıesine iske qosý josparlanǵan. Osy qarajat esebinen avtojoldardy saqtaýǵa jumsalatyn shyǵyndar aıtarlyqtaı qysqarady.
Al byltyr elimizde 1,5 myń shaqyrym respýblıkalyq mańyzy bar jol jóndelip, 528 shaqyrym rekonstrýksııalanǵan bolatyn. Bıyl respýblıkalyq mańyzy bar 4,4 myń shaqyrym avtojol jóndeýden ótedi. Jobalarǵa 100 myńnan astam jumysshy tartylady. Jyldyń sońyna deıin uzyndyǵy 654 shaqyrym ýchaskede qozǵalys ashylýy tıis.
Sonymen qatar mınıstr azamattyq avıasııada kórsetkishterdiń turaqty ósip kele jatqanyn atap ótti. Mınıstrdiń aıtýynsha, osy jyldyń I jartyjyldyǵynda FlyArystan alǵashqy ulttyq áýe tómen bıýdjetti áýekompanııasy iske qosylmaq. Birinshi jylda «Eır Astana» áýe kompanııasyndaǵy baǵadan eki ese tómen aqymen 1 mln jolaýshyǵa deıin tasymaldaý josparlanyp otyr. Jańa áýe tasymaldaýshysynyń basty mindeti – halyqty barynsha bıýdjettik tasymalmen qamtamasyz etý.
−Jańa loýkosterde ushý quny 40-50 dollar shamasynda bolady. FlyArystan bıletterin satý naýryz aıynyń sońynda – sáýir aıynyń basynda bastalady, – dep naqtylady J.Qasymbek.
Aıta keterligi, bıyl FlyArystan áýe kompanııasynyń reısteri Almatydan Astana, Atyraý, Kókshetaý, Pavlodar, Qaraǵandy, Qostanaı jáne Taraz qalalaryna ushady dep josparlanyp otyr.
Erkejan AITQAZY,
«Egemen Qazaqstan»