Astana qalasyndaǵy Nursultan Nazarbaev halyqaralyq áýejaıynda (1-Termınal) kommersııalyq jáne óndiristik nysandardaǵy aýqymdy keńistikterdi tazalaýǵa arnalǵan avtonomdy tazalaǵysh robot tanystyryldy. Jobany Tech Garden derbes klasterlik qorynyń portfeldik startapy «QZ avtonomdy tehnologııalar» kompanııasy Startup Kazakhstan akselerasııasyna qatysý barysynda júzege asyrdy. Atalǵan baǵdarlamaǵa Indýstrııa jáne ınfraqurylymdyq damý mınıstrligi qoldaý kórsetip otyr.
Tusaýkeser barysynda elektrondy tazalaǵyshtardyń qalaı jumys isteıtini kórsetildi. Tolyǵymen avtonomdy qurylǵy edendi jýý barysynda adamdardy, qabyrǵalardy jáne basqa da kedergilerdi aınalyp ótip, keńistikte adamnyń aralasýynsyz qozǵalady. Sonymen qatar robot únemdep, qaıta paıdalaný maqsatymen sýdy ishki qorabynda tazalaıdy. Jasandy ıntellekt elementteri engizilgendikten birneshe robot bir bólmede bir-birine kedergi keltirmeı qozǵalady. Tipti robot-jumyskerler qajet bolǵan jaǵdaıda, batareıa men sýdy aýystyrý maqsatynda ózdiginen bazaǵa attanady.
– Tech Garden usynǵan úsh aılyq akselerasııaǵa qatysý arqyly qajetti bilim alyp, robotty óndiristik maqsatta qurastyrýǵa daıyn deńgeıge jetkizdik. Sodan soń Qazaqstanda alǵashqy iri tapsyrys berýshi kompanııany taptyq. Birinshi robottar Astanadaǵy Nursultan Nazarbaev halyqaralyq áýejaıynda iske qosyldy, – deıdi joba avtory Nıkolaı Potapov.
Qazirgi tańda atalǵan startap qazaqstandyq kompanııalarǵa 100 robotty jetkizýge kelisim jasasqan. Sondaı-aq reseılik kompanııalarǵa 500 robotty jetkizý týraly kelissózder júrgizýde. Bir robottyń quny – 2,5 mln teńge. Bul robottyń tehnologııalyq sıpattamasy qoldanystaǵy analogtarynan joǵary bolǵanymen, baǵasy birneshe ese arzan. Qazir elimizde osy robottardyń ónerkásiptik óndirisin qurý máseleleri qaralýda.
«Elbasy qoıǵan tapsyrmalardy oryndaý aıasynda Startup Kazakhstan baǵdarlamasynyń nátıjesin kórip otyrmyz. Maqsat – otandyq startaptardy qoldaý jáne sheteldik startaptardy tartý arqyly Qazaqstanda joǵary tehnologııalyq kompanııalar jıyntyǵyn qurý. Úkimettiń qoldaýymen Tech Garden klasteriniń aınalasynda tolyq ekojúıe qurylyp, TMD elderinen startaptardyń tıimdi aǵyny ornatyldy. Búgin Startup Kazakhstan baǵdarlamasynyń nátıjesinde ıakýttyq startaptyń joǵary tehnologııaly qazaqstandyq kompanııaǵa aınalýyn kórdińizder. Atalǵan kompanııa Qazaqstanda tirkelip, salyq tólep, el ekonomıkasyna qatysýda», deıdi Tech Garden derbes klasterlik qorynyń bas dırektory Sanjar Kettebekov.
«Egemen-aqparat»