Elimiz ınternet taratýdyń jańa sapasyna qol jetkizbek. Bul týraly Aqparat jáne kommýnıkasııalar mınıstri Dáýren Abaev mınıstrliktiń keńeıtilgen alqa otyrysynda aıtty. Atalǵan vedomstvonyń byltyrǵy jumysyn qorytyndylap, bıylǵy mindetterin aıqyndaǵan jıynǵa Prezıdent Ákimshiliginiń ókilderi, Parlament depýtattary, aqparat jáne baılanys salasynyń qyzmetkerleri qatysty.
Aqparat jáne kommýnıkasııalar mınıstri Dáýren Abaev ótken jyly atqarylǵan mańyzdy isterge toqtaldy. Sonyń alǵashqysy retinde «Sıfrly Qazaqstan» memlekettik baǵdarlamasy aıasynda elimizdegi 4 aımaqtyń tolyq sıfrly habar taratýǵa kóshkenin aıtty. «Byltyr elimizde analogtyq tele-radıo habar taratýdy kezeń-kezeńimen toqtatý jumystary bastalǵan edi. Búginde Mańǵystaý, Túrkistan, Jambyl oblystary jáne Shymkent qalasy tolyǵymen sıfrly habar taratýǵa kóshti», dedi ol. Osynyń nátıjesinde aýyl turǵyndary 15, qalalyqtar 30 arnany sapaly formatta kórýge múmkindik alǵan. Mınıstrdiń málimetinshe, atalǵan jumys aldaǵy ýaqytta Qostanaı men Pavlodar oblystarynda jalǵasady. Al bul baǵyttaǵy is 2022 jyly tolyǵymen aıaqtalady. Budan bólek, mınıstr eldegi áleýmettik az qamtylǵan top sıfrly televızııa quraldaryna tegin qol jetkizgenin aıtty. Al aldaǵy kezeńde shalǵaıdaǵy eldi mekender otandyq «Otaý tv» spýtnıktik tabaqshalarymen qamtylmaq. Osy úshin óńirlerde jergilikti bıýdjetten qarjy bólingen.
Mınıstr byltyr «Tamasha TV» arnasynyń iske qosylǵanyn, sondaı-aq «Mýlt» telearnasynyń endi qazaqsha «sóıleıtinin» tilge tıek etti. «Qazaqstanda reseılik «Mýlt» telearnasy joǵary reıtıng kórsetip otyr. Osyǵan oraı biz atalǵan arnany qazaq tilinde taratýǵa kelisim jasadyq. Alǵashynda jekelegen mýltfılmder aýdarylady. Sonan soń birtindep qazaq tilinde xabar taratýdy ulǵaıtý josparlanyp otyr», dedi ol. Sondaı-aq mınıstrliktiń tapsyrysymen otandyq telearnalar men kompanııalardyń tarıh, tanym, dástúr, sport tóńireginde 46 serıal túsirgenin jáne joǵary kórsetkishke ıe bolǵanyn jetkizdi. Qazaq televızııasynyń 60 jyldyq mereıtoıy atalyp ótken 2018 jyly jýrnalısterdi yntalandyratyn «Úrker», «Tumar» ulttyq syılyqtaryn tabystaý men medıa salany jandandyrýǵa baǵyttalǵan «Astana media week» sharasy, sondaı-aq «Qazaqstannyń 100 jańa esimi» jobasynyń ekinshi kezeńiniń tabysty ótkenin aıtty.
Mınıstrlik jumysynyń taǵy bir baǵytyna erekshe toqtalǵan D.Abaev «Ashyq úkimet» portalynyń mobıldi jáne kózi nashar kóretin azamattarǵa arnalǵan qosymshalary da iske qosylǵanyn málimdedi. Onyń aıtýynsha, atalǵan portaldaǵy derekter sany jyl sanap artyp keledi. Mınıstr: «Ashyq úkimet» portalynda 2018 jyly 150 jańa derek paıda boldy. Budan bylaı Astana turǵyndary portaldyń kómegimen qoǵamdyq kólikterdiń qozǵalysyn baqylaı alady. Halyqqa qyzmet kórsetý ortalyqtaryndaǵy kezekti kórip otyrýǵa da múmkindik bar. Sonymen qatar bala týýyna baılanysty beriletin memlekettik járdemaqyny alatyndardyń sanyn bilýge de bolady», dedi. Sóz arasynda «Elektrondy úkimet» portalynyń da jyldyq jumysyn atap ótken vedomstvo basshysy 2018 jyly 30 mln-nan astam elektrondy formatta qyzmet kórsetilgenin, portalǵa 8 mln-nan astam adam tirkelgenin sóz etti. «Elektrondy úkimettiń damý deńgeıi boıynsha Qazaqstan BUU zertteý qorytyndysynda 39-orynnan kórindi. Bul – óte joǵary kórsetkish», dedi ol.
Kommýnıkasııalar baǵyty boıynsha iske asyrylǵan mańyzdy jobalardyń biri retinde D.Abaev 2018 jyly iske qosylǵan Astana Hub tehnoparkin atady. Mınıstrdiń málimetinshe, tehnopark jumysynyń nátıjesi kóńil qýantarlyq. Az ýaqyttyń ishinde 47 startap tańdalyp, 180 mln teńge ınvestısııa tartyldy. Keler jyly onyń kólemin 4,8 mlrd teńgege arttyrý mindeti tur.
Sondaı-aq mınıstr Halyqqa qyzmet kórsetý ortalyqtarynda (HQO) ilgerileý baryn alǵa tartty. Onyń aıtýynsha, el aýmaǵyndaǵy HQO-lar azamattarǵa 32 mln qyzmet kórsetken, Atyraý men Oral qalasynda arnaıy HQO, sondaı-aq barlyq oblys pen qalalarda sıfrly HQO-lar ashyldy, mıgrasııalyq HQO-lardy ashý jalǵasady.
Al memlekettik mekemelerdiń saıtyn biryńǵaılaý isi aldaǵy kezde naqty qolǵa alynbaq. Bul týraly: «Bıyl biz memlekettik organdar úshin biryńǵaı gov.kz ınternet-portalyn qurastyramyz. Bul portal qazir synaqtan ótip jatyr», dedi D.Abaev. Osy júıe engizilse, memlekettik saıttarǵa ketetin qarjydan mıllıard teńge únemdeýge bolady.
Búginde ınternet qoldanýshylar qatary qarqyndy ósip keledi. Osy oraıda mınıstrlik bıyl Qazaqstanda 5G ınternetine qol jetkizýdi josparlap otyr. Internettiń 5G jyldamdyǵy aldymen Astana, Almaty qalalary jáne oblys ortalyqtarynda synaqtan ótkiziledi. Bul úshin eń aldymen Mysyrda ótetin Dúnıejúzilik radıo baılanysy konferensııasynda Halyqaralyq elektr baılanysy odaǵy 5G standartyn qabyldaýy kerek. Alqa májilisiniń sońynda sóz alǵan Premer-Mınıstrdiń orynbasary – Qorǵanys jáne aeroǵarysh ónerkásibi mınıstri Asqar Jumaǵalıev: «Keı anyqtamalardy bir memlekettik organnan alamyz da, ekinshisine aparyp beremiz. Olar ózderi de bir-birine qajetti anyqtamalardy joldaı alady», deı kele, D.Abaevqa anyqtamalardy qysqartýdy tapsyrdy. Sonymen qatar A.Jumaǵalıev «Azamattarǵa arnalǵan úkimet» memlekettik korporasııasynyń basty mindeti – uıaly telefon arqyly memlekettik qyzmet kórsetýge basymdyq berý ekenin jetkizdi. Onyń aıtýynsha, mobıldi qosymshalar turǵyndarǵa qolaıly ári olardyń ýaqytyn únemdeýge septigin tıgizedi. Osyǵan qosa Vıse-premer memlekettik organdar men otandyq kompanııalar IT-tapsyrystardy shetelge emes, otandyq ınnovatorlarǵa berýi úshin Astana Hub tehnoparki korporatıvti ınnovasııalardyń ortalyǵyna aınalýy qajettigin aıtty.
Aıdana ShOTBAIQYZY,
«Egemen Qazaqstan»