Astanadaǵy «Qazaqstan» ortalyq konsert zalynda Mádenıet jáne sport mınıstrligi Parlament depýtattary, qoǵam qaıratkerleri, mádenıet, sport jáne týrızm salasy ókilderiniń qatysýymen keńeıtilgen alqa otyrysyn ótkizdi.
Kún tártibindegi basty taqyryp Elbasy Joldaýyndaǵy tapsyrmalar sheńberindegi basym baǵyttardy júzege asyrý negizinde órbidi. Mınıstrlik jınalysynda, sondaı-aq ótken jyldyń jumys qortyndylary men salanyń 2019 jyldaǵy damý keleshegi qarastyryldy.
Alqaly jıynnyń shymyldyǵyn Mádenıet jáne sport mınıstri Arystanbek Muhamedıuly ashyp, 2018 jyly rýhanııat, týrızm jáne sport keńistiginde atqarylǵan aýqymdy sharalarǵa jan-jaqty toqtaldy. Mınıstr óz sózinde, ásirese, óner men sport salasynda jetistikke jetip, Qazaqstan atyn álemge tanytyp júrgen jastardyń juldyzdy jeńisine toqtalyp, aldaǵy ýaqytta da talantty ónerpazdarǵa júıeli túrde qamqorlyq kórsetiletinin jetkizdi. Budan bólek, Elbasy Nursultan Nazarbaevtyń «Bolashaqqa baǵdar: rýhanı jańǵyrý» baǵdarlamalyq maqalasy aıasynda atqarylǵan sharalardy da keńinen baıandady.
Teatr men kıno, mýzyka men sport salasynda jetken jetistikter aýyz toltyryp aıtarlyq. Máselen, ǵalamat daýsymen álem nazaryn ózine aýdarǵan Dımash Qudaıbergen, kıno men teatr keńistiginde bıik belesterdi baǵyndyryp júrgen aktrısa Samal Eslıamova, rejısser Ámir Baıǵazın, dırıjer Alan Bóribaev, opera men balet óneriniń úzdik solısteri – Súndet Baıǵojın, Medet Shotabaev, Saltanat Ahmetova, Bahtııar Adamjanov syndy ónerpazdardyń eńbegine erekshe mán berildi.
– Memleketimiz, onyń ishinde Mádenıet jáne sport mınıstrligi Elbasynyń tikeleı qoldaýymen jas talanttarymyzdyń ósip, bıikke qanat qaǵýyna barynsha jaǵdaı jasap, keń múmkindik ashyp otyr. Sol sekildi jas kórermenderimizdiń talǵamynyń qalyptasýyna da rýhanııat álemi jan-jaqty ári tyńǵylyqty eńbek etip keledi. Bul, ásirese, kıno men teatr salasynda aıqyn kórinis taýyp otyr. Máselen, Memleket basshysy Nursultan Nazarbaevtyń «Uly dalanyń jeti qyry» maqalasynda sóz bolǵan tarıhı tulǵalarymyzdyń kórkem beınesin ekranǵa shyǵarýda «Qazaqfılm» kınostýdııasy jemisti jumystar atqarýda. Atap aıtsaq, olardyń qataryna jaqynda jaryqqa shyǵýy josparlanǵan Aqan Sataevtyń «Tomırıs», Rústem Ábdirashtyń «Altyn taq» syndy tarıhı fılmderimen qatar, «Altyn adam» bastaǵan birneshe anımasııalyq týyndylardy da qosyp qoıýǵa bolady. Osyndaı týyndylar elimizdiń erteńi úshin qyzmet etedi, óskeleń urpaqty ultjandylyq rýhqa tárbıeleıdi dep senemiz. Buǵan jaqynda ǵana qabyldanǵan «Kınematografııa týraly» Zańymyz da tolyq múmkindik beredi dep senimmen aıta alamyn, – dedi Arystanbek Muhamedıuly óz baıandamasynda.
Sondaı-aq mınıstr 2018 jyly kadrlyq ózgerister negizinde Mádenıet jáne sport mınıstrligi men elimizdiń beldi óner oshaqtarynyń basshylyǵyna kelgen jańa qyzmetkerlermen tanystyryp ótti. Olardyń qatarynda Ulttyq olımpıada komıtetiniń bas hatshysy Sáken Musaıbekov, vıse-mınıstr Eldos Ramazanov, Sport jáne dene shynyqtyrý isteri komıtetiniń tóraǵasy Serik Sápıev, Qurmanǵazy atyndaǵy Qazaq ulttyq konservatorııasynyń rektory Arman Júdebaev, T.Júrgenov atyndaǵy Qazaq Ulttyq óner akademııasynyń rektory Ashat Maemırov, M.Áýezov atyndaǵy Qazaq memlekettik akademııalyq drama teatrynyń dırektory Sábıt Ábdihalyqov, Ǵ.Músirepov atyndaǵy Qazaq memlekettik akademııalyq balalar men jasóspirimder teatrynyń dırektory Azamat Satybaldy jáne taǵy da basqa mamandar bar.
Alqaly jıyndy odan ári «Qasterli Qazaqstan» ǵylymı-zertteý ortalyǵynyń jetekshisi Berik Ábdiǵalı, Qazaqstan Jazýshylar odaǵynyń tóraǵasy, aqyn Ulyqbek Esdáýlet, Qazaqstan kınematografıster odaǵynyń tóraǵasy, kınorejısser Ermek Tursynov, Sport jáne dene shynyqtyrý isteri komıtetiniń tóraǵasy Serik Sápıev óz salasy boıynsha baıandamalarymen jalǵady. «Rýhanı jańǵyrý», «Uly dalanyń jeti qyry» baǵdarlamalary men jalpy Jastar jyly aıasynda ádebıet, mádenıet, óner jáne sport salasyndaǵy ústimizdegi jyly atqarylýy tıis aýqymdy jobalar da jıynda jan-jaqty sóz etildi.
Nazerke JUMABAI,
«Egemen Qazaqstan»