Jastar jylyndaǵy elorda halqyn qýantqan aıtýly jańalyq – «Astana» komedııa teatrynyń ashylýy desek, artyq aıtqandyq emes. Iá, endi bas qalanyń komedııa janryna salalanǵan kásibı teatry bar.
2018 jyldyń qazan aıynda resmı túrde qurylǵan teatrdyń dırektory ári kórkemdik jetekshisi – Qazaqstannyń eńbek sińirgen qaıratkeri Tursynbek Qabatov, bas rejısseri – Saılaý Qamıev.
Astana qalasy ákimdiginiń qoldaýymen ómirge kelgen óner ordasy jańa jylda qos birdeı komedııasyn kórermen nazaryna usynyp úlgerdi. Onyń alǵashqysy – jas teatrdyń tusaýyn kesken M.Freınniń «Teatr 180◦» qoıylymy bolsa, ekinshisi – fransýz dramatýrgi M.Kamolettıdiń «Merekelik menıý» komedııasy.
– Komedııa teatry bolǵannan keıin, árıne, negizgi basymdyq otandyq jáne sheteldik dramatýrgterdiń úzdik qoıylymdaryna beriledi. Aldaǵy ýaqytta astarly, aıtary mol komedııalarmen qatar, Ý.Shekspır, A.Chehov sııaqty klassık dramatýrgterdiń de pesalaryn sahnaǵa shyǵarý josparda bar. О́ıtkeni biryńǵaı kúlki janryna oıysa bersek, akterlerimizdiń shyǵarmashylyq ósýin taptaýryndylyqqa uryndyryp alýymyz múmkin. Sondyqtan da teatr repertýarynyń 80 paıyzyn komedııa janryndaǵy qoıylymdarǵa arnasaq, qalǵan 20 paıyzy drama men tragedııaǵa arnalady dep kútilýde. Teatr trýppasynyń barlyǵy derlik jastar bolǵandyqtan, sahnaǵa jastyq jalyndy, tazalyqty alyp kelgimiz keledi, – deıdi teatrdyń bas rejısseri, Qazaqstannyń eńbek sińirgen qaıratkeri Saılaý Qamıev.
Astanadaǵy Qazaq ulttyq óner ýnıversıtetin akter, rejısser Saılaý Qamıev sheberhanasy boıynsha támamdaǵan jastardan quralǵan teatr trýppasynda barlyǵy 31 akter qyzmet etedi. Jaqynda premerasy ótken fransýz dramatýrgi M.Kamolettıdiń «Merekelik menıý» komedııasynan sol jastardyń birqatarynyń ónerin tamashalaý múmkindigi týdy. Atap aıtsaq, Jaklın rólinde – Aqbota Mákejanova men Altynaı Qojahmetova, Bernard – Álı Bıdahmet pen Nurjan Asylhan, Robert – Álı Jarasuly, Ǵanı Berdenbetov, Sıýzetta – Aısha Aǵymbaı, Albına Ýálıeva, Sıýzanna – Eńlik Aıymǵazy, Ásel Nurtazına jáne Djordj rólinde Baǵlan Imanǵazınov pen Beıbarys Asqarbekov óz ónerlerin kórermen nazaryna usyndy. Shytyrman oqıǵaǵa qurylǵan sıtýasııalyq komedııadaǵy oqıǵa jelisiniń kútpegen burylystary, shyr aınaldyrar ıntrıga men tartysty sıýjet akterlerdiń mindetterin qıyndatqanymen, ishki jáne syrtqy plastıkasyn, jalpy shyǵarmashylyq múmkindigin kórsetýine tamasha jol ashqany anyq. Aldaǵy ýaqytta da teatr osy izdenisin jalǵastyra berse, sandyq qana emes, sapalyq turǵydan da jańa beleske kóterilip, óner áleminde óz qoltańbasyn qalyptastyratynyna senim mol. Oǵan jas trýppanyń shyǵarmashylyq qarymy tolyq jetedi.
Nazerke JUMABAI,
«Egemen Qazaqstan»