Almatyda arnaıy jasaqtalǵan mamandardyń qatysýymen «Kóktem-2019» komandalyq-shtabtyq oqý-jattyǵý sharasy ótti. Jaýapty qyzmet ókilderi ózderiniń kóktemgi sý tasqynyna daıyndyǵyn tekserdi.
Oqý-jattyǵý jumystarynyń nátıjesinde Qarǵaly ózeniniń Alataý aýdany aýmaǵyna qarasty 1,5 shaqyrymy muzdan tazartyldy. Mamandar ózenge jaqyn ornalasqan úılerge tóngen qaýip tolyqtaı seıilgenin aıtady. Oǵan qosa tótenshe jaǵdaıdyń aldyn alý aıasynda 50 shaqyrym aýmaqtaǵy qala ózenderiniń arnalary bekitilgen.
«Eki jylda atqarylǵan jumystardyń arqasynda, 55 ýchaskide qaýip joıyldy. Qazir qala boıynsha 12 núkte ǵana qalyp otyr. Onyń altaýy Alataý aýdanynda, tórteýi Jetisý aýdanynda ornalasqan. Búgingi tańda Alataý aýdanyndaǵy 4 ýchaskide aryq júıesin salýdyń jobalyq qujattary daıyn, taǵy ekeýi rásimdelý ústinde», – deıdi Almaty qalasy TJD basshysynyń orynbasary Erlan Álibekov.
Almaty qalasynyń birqatar aýdany taý shatqaldaryna jaqyn ornalasqandyqtan, bul aýmaqtardaǵy saqtyq sharalary barynsha kúsheıtilgen.
Arman OKTIаBR,
«Egemen Qazaqstan»
ALMATY