Bir sannan ketken qatelik saldarynan 84 fermer 132 mıllıon teńge jeńildikti qarajattan qaǵylyp otyr.
Vıktor Mamaev tórt túlik ósirýmen kópten beri aınalysady. Byltyr memlekettik baǵdarlamaǵa qatysý arqyly 4 mıllıon teńge sýbsıdııa almaq maqsatyna áli kúnge deıin qol jetkize almaı júr. Biryńǵaı sıfrlyq baǵdarlamanyń «qateliginen» osyndaı keleńsiz jaǵdaıǵa tap bolǵan. Tıisti organdarǵa júgingenimen, dop sııaqty qaqpaqyldap, bir-birine jumsaǵan. Amaly taýsylǵannan keıin jergilikti kásipkerler palatasyna aryzdanýǵa májbúr bolǵan. О́ıtkeni, zaýyttan 8 mıllıon teńgege mıneraldyq tyńaıtqysh satyp alǵandyqtan, jumsalǵan qarajattyń 50 prosentin memleket sýbsıdııa túrinde qaıtarý kerek. Alaıda, ol qarajatty qashan alary belgisiz.
Sýbsıdııa alatyn sharýalardyń tizimi sıfrlyq baǵdarlama arqyly anyqtalǵan. Kásipkerler palatasynyń otyrysynda belgili bolǵandaı baǵdarlamany Astana qalasyndaǵy «Aqparattyq eseptik ortalyq» AQ-y ázirlegen. Jobada shıkilik tustar kóp kórinedi. Bir sıfrdy durys jazbaý saldarynan V. Mamaevty ádilet organdaryndaǵy biryńǵaı bazaǵa jeke tulǵa emes, zańdy tulǵa sanatyna qosyp qoıypty. Qarjy mınıstrligi tarapynan ketken jańsaqtyq soltústikqazaqstandyq 84 fermerdi san soqtyrǵan.
«Bul jaıtty Bas prokýratýraǵa deıin jetkizemiz. Tipti sotqa júginýge týra keletin shyǵar. Qalaı desek te, sheshimin tabýdyń jolyn tappaıynsha máseleni aıaqsyz qaldyrmaımyz», deıdi palata janyndaǵy kásipkerlerdiń quqyǵyn qorǵaý keńesiniń tóraıymy Inessa Qýanova.
О́mir ESQALI,
«Egemen Qazaqstan»
Soltústik Qazaqstan oblysy