Sharaǵa «JańǵyryQ» jobasynyń prodıýseri, «Maqpalsher» jobasynyń avtory Maqpal Jumabaı, ánshi-avtorlar Marhaba Sábı, Arshat Haırolla, Erbol Narımanuly qatysty.
«Qazaqstan» telearnasy mýzykadaǵy ár túrli baǵyttardy júıeli túrde nasıhattap keledi. Basym baǵytymyz – ulttyq án-kúı óneri. «Men qazaqpyn» ulttyq mega jobasy men «Uly dala sazy» jobasy – aqparattyq keńistigimizdegi ulttyq mýzyka baǵytyndaǵy biregeı jobalar retinde óz ornyn aıqyndady. Bul jumys maqsatty túrde jalǵasyn tabady. «Qazaqstan» telearnasynyń kórermenderi san alýan, sonyń ishinde jastardyń úlesi kóp. Sol jastarymyzdyń otandyq mýzykany tyńdap, talǵamy men tańdaýy qatar damýy úshin zamanaýı mýzykaǵa da den qoıyp otyrmyz. Jańashyl týyndylar usynyp júrgen jastardy da qoldap kelemiz. О́z jerimizde paıda bolǵan q-pop janrynyń jankúıerleri de kóp. Qazaq tili men qazaq mýzykasyn túrlendirip, ózdiginshe damytqan bul sýbmádenıetke de arnamyz efırinen oryn berdi. Sonymen qatar, elimizdiń mádenı ómirindegi eleýli oqıǵa – Dımash Qudaıbergenniń halyqaralyq deńgeıdegi «Arnaý» atty iri konsertin «Qazaqstan» teleradıokorporasııasy uıymdastyryp otyr. Bul – biz úshin mártebe ári zor jaýapkershilik. Al nazarlaryńyzǵa usynyp otyrǵan «JańǵyryQ» jobasy zamanaýı qazaq mýzykasynda óz jolyn salyp kele jatqan avtorlyq mýzykaǵa arnalǵan. Bul joba ózindik oıymen, oryndaý mánerimen, shyǵarmashylyq ıdeıasymen erekshelenetin avtorlardy jınaıtyn mýzykalyq alań. «JańǵyryQ» – avtorlyq mýzyka men jandy dybysty nasıhattaıtyn elimizdegi birden-bir mýzykalyq joba. Bul joba mýzyka salasyndaǵy avtorlyq kózqaras pen oryndaýshylyq ózgeshelikterdi kórsetýimen qundy. Joba buqaralyq sıpat alǵan búgingi án ónerine jańa tynys beredi. Sol arqyly ózindik áýezi men ustanymy bar avtorlardyń qalyptasýyna sebep bolmaq. Biz «JańǵyryQ» jobasy arqyly jańa mýzykalyq baǵyttardyń, mádenı qaýymdastyqtardyń týýyna yqpal etemiz dep senemiz», - dedi joba prodıýseri Maqpal Jumabaı.
«JańǵyryQ» jobasy 4 konsertten turady. Joba ereksheligi – ár oryndaýshynyń óz mýzykalyq toby bar jáne ol óziniń avtorlyq týyndylaryn ǵana oryndaıdy. Jobaǵa eksperımentaldy elektrondy mýzyka ókilderi de qatysty. Al túsirilim bir dýblmen, konserttiń shynaıylyǵyn saqtaý arqyly júzege asty. Dybys pen vıdeo sapasyn qamtamasyz etý úshin arnaıy rejısserlyq top pen dybys rejısserleri jumys istedi.
Jıyn barysynda Marhaba Sábı: «Jandy daýystaǵy konsertter men live formattaǵy jobalarǵa ǵana qatysamyn dep osydan bir jyl buryn sheshim qabyldaǵan edim. Degenmen, bul ustanymymyzdy júzege asyratyn alańdar az boldy. Osy rette «Qazaqstan» telearnasynyń bul bastamasy óte mańyzdy. Mundaı jobalar biz sekildi ánshi-avtorlardyń shyǵarmashylyq múmkindigin ashýǵa, jandy dybystyń saltanat qurýyna jáne tyńdarmannyń talǵamynynan shyǵýǵa yqpal etedi» dedi.
Jobaǵa 12 oryndaýshy qatysty. Olar: Moldanazar toby, Marhaba Sábı, Satzhan project, Maqpalsher, Darkhan Juzz, Jeltoksan, DAMU, Qonyratbay Fam, Qudyr, ARShAT, ámir.
Joba qatysýshylarynyń biri Ǵalymjan Moldanazar túsirilim barysynda: «Osyndaı jandy daýystaǵy mýzykany halyqqa týra, betperdesiz jetkizip jatqany úshin uıymdastyrýshylarǵa alǵys aıtamyn. Biz úshin mundaı joba birinshi ret, sondyqtan qobaljımyz. Bul – biz úshin úlken tájirıbe. Árbir ýaqyttyń tolqyndary men jelisi bolady. Ol árdaıym bolǵan, bolady da. Eń mańyzdysy, bizdiń ony qalaı jetkizetinimiz. Osyndaı jobalar jalǵasatyn bolsa, mýzykamyz úshin keremet serpilis bolady dep oılaımyn» degen pikirin bildirgen bolatyn. Al Satzhan project jobasynyń jetekshisi Sátjan Shámenovtiń pikirinshe, «bul joba elimizdegi mýzykanyń sapalyq deńgeıiniń kóterilýine septigin tıgizip, jandy dybystyń qozǵalys retinde damýyna yqpal etedi».
Baspasóz-konferensııasy sońynda «JańǵyryQ» jobasynan úzindi kórsetildi.
«JańǵyryQ» jobasynyń tusaýkeserin 6 sáýir kúni, 11:40 ta «Qazaqstan» Ulttyq arnasynan kóre alasyzdar!
Aıta keteıik, «JańǵyryQ» jobasynyń ıdeıa avtory Erlan Qarın, prodıýseri Maqpal Jumabaı, qoıýshy rejısseri Toǵjan Qurmanjanqyzy, dybys rejısseri Oralhan Sádýaqas.