Ákimniń aıtýynsha, bılik jumysynyń basty baǵyty - adamdardyń ómir sapasyn jaqsartý bolyp tabylady. Osy jyldyń qańtar aıynan bastap oblys kásiporyndaryndaǵy 220 myń jumysshynyń eńbekaqysy 14%-ǵa ósti. Kommýnaldyq qyzmetterge tarıfter orta eseppen 5 -10%-ǵa tómendedi. Bul turǵyndarǵa jylyna 3,2 mlrd. teńge deıin qarajattaryn únemdeýge múmkindik beredi.
Erlan Qoshanov sonymen qatar halyqty tolǵandyratyn basty máselelerdiń biri – turǵyn úı jáne ınfraqurylym ekenin atap ótti. Atalmysh salaǵa qatysty ótken jyly óńirde 4135 páter paıdalanýǵa berildi.
- Oblysta 36 myńǵa jýyq kezekte turǵandar bar. Sondyqtan da bizdiń mindetimiz barynsha kóp baspana salý, - dedi aımaq basshysy.Qurylys Qaraǵandy qalasynda ǵana emes, Jezqazǵan, Balqash jáne basqa qalalar men aýdandarda da belsendi túrde júrgizile bastaldy. Bıyl taǵy 440 myń sharshy metr turǵyn úı paıdalanýǵa beriledi.
- Kezekte turǵandar qatarynan 1100-den astam otbasy páter alady, - dep atap ótti aımaq basshysy.
Jeke qurylys kompanııalary úsh jyl ishinde «7-20-25» baǵdarlamasy boıynsha 3,5 myń páter salýdy josparlap otyr. Olardyń 1000-nan astamy osy jyly tapsyrylady.
Sondaı-aq oblystyq bıýdjetten bastapqy jarnany sýbsıdııalaýǵa turǵyn úı sertıfıkattary úshin bir mlrd. teńge bólindi. Olardy baǵdarlamaǵa qatysýshy 1000-nan astam otbasy alady.
Qoǵamdyq keńes múshelerin muǵalimder men basqa da bıýdjet qyzmetkerlerine arnalǵan turǵyn úı, jol jaǵdaıy, stýdentterdi jataqhanadaǵy oryndarmen qamtamasyz etý máseleleri qyzyqtyrdy.
- Men ásirese aýyldyq jerlerden kelgen stýdentter úshin ózekti taqyrypty kótergim keledi. Bul jataqhananyń qoljetimdiligi. Osy baǵytta qandaı jumystar júrgizilýde? – dep surady Aleksandr Zevahın.
Erlan Qoshanov qazir oblysta jataqhanalarda 2350 oryn jetispeıtinin rastady. Onyń ishinde kolledjderde 950 oryn jáne JOO-da 1300 oryn. Biraq bul máseleni bılik sheshýge ýáde berdi.
- Jumys Elbasynyń 5 áleýmettik bastamasy aıasynda júrgizilýde, - dedi oblys ákimi. - Balqashta, Abaı men Qaraǵandyda kolledj stýdentterine arnalǵan jataqhanalar salyndy. Bıyl Qarqaraly qalasynda 100 oryndyq taǵy bir jataqhana qurylysyn bastaımyz. Sondaı-aq, medısına ýnıversıteti bıyl birinshi jataqhananyń qurylysyn bastaýdy josparlap otyr. Olardyń barlyq qujattary bar, jer telimin biz bóldik. Tehnıkalyq ýnıversıtet basshylyǵy ınvestor tapty. Jaqynda olar da qurylysqa kirisedi. Aldaǵy eki jylda oblystaǵy jataqhanalar máselesi jabylady.
Sondaı-aq, oblys ákimi óńirdegi sý tasqyny jaǵdaıy týraly da toqtala ketti. Oblys boıynsha jaǵdaı turaqty jáne baqylaýda. Bul úlken daıyndyq jumystarynyń arqasynda múmkin boldy. 77 eldi mekende qorǵanys dambalary men úıindileri salyndy, ózen jaǵalaýlary nyǵaıtyldy.
- Aldyn alý sharalarynyń arqasynda eldi mekenderdi sý basýǵa jol berilgen joq. Búginde barlyq qyzmetter táýlik boıy joǵary daıyndyq rejıminde jumys isteýde, - dep atap ótti Erlan Qoshanov.