«Qarapaıym zattar ekonomıkasyn» damytý sheńberindegi jeńildikpen kredıt berý baǵdarlamasy boıynsha bólingen 600 mlrd teńge kredıt qarajatynyń 200 mlrd teńgesi agroónerkásiptik keshendi damytýǵa baǵyttalatyn bolady. Bul týraly Úkimet otyrysynda Aýyl sharýashylyǵy mınıstri S.Omarov málimdedi.
«100 mlrd teńge aýyl sharýashylyǵy ónimderin óńdeýge jumsalady, munda mólsherleme Bıznestiń jol kartasy-2020 esebinen sýbsıdııalanady», dedi mınıstr.
Mınıstrliktiń aqparatyna súıensek, qalǵan 100 mlrd teńgesi aýyl sharýashylyǵy óndirisin damytýǵa baǵyttalady. Munda mólsherleme Aýyl sharýashylyǵy mınıstrliginiń baǵdarlamasy boıynsha sýbsıdııalanady. Bul maqsatqa bıýdjette qarajat jetkilikti.
«Bizdiń baǵalaýymyz boıynsha 200 mlrd teńgeden astam somaǵa elimizdiń agroónerkásiptik keshenin damytý úshin mańyzdy 34 iri joba boıynsha áleýetimiz bar», dedi S.Omarov.