Sporttyq is-sharanyń negizgi demeýshisi - BI Group qurylys holdıngi. Qatysý úshin tirkeýden jınalǵan barlyq qarajat «BI Juldyzaı» qaıyrymdylyq qoryna BSP dıagnozy bar balalardy emdeý jáne ońaltýǵa jumsalatyn bolady.
BI Marathon ótkizýdiń dástúrli ýaqyty kezdeısoq tańdalǵan joq. Mamyr aıynyń sońyna qaraı júgirýshilerde qajetti shaqyrymdy baǵyndyrýǵa jáne muqııat daıyndalýǵa ýaqyt jetkilikti.
Osy jyly júgirýge tirkelý 16 jeltoqsanda bastalǵan bolatyn. Qazirgi tańda Olımpıada chempıony Serik Sápıev marafonǵa qatysatynyn rastady. Sondaı-aq, jeńil atletıka federasııasynyń ókilderimen kelissózder júrgizilýde. Sonymen qatar, olardyń arasynda álem chempıonatyna qatysýshylar, ártister men ánshiler bar.
«Tirkeý tolyq júrip jatyr. Búgin 4 myńǵa jýyq adam tirkelgen. Jelaıaqtardyń qaıdan keletinin boljaý qıyn, sebebi tirkelý onlaın rejıminde júrýde. Biraq ótken jyldardyń tájirıbesine súıene otyryp, sportshylar álemniń 22-den astam elinen, sonyń ishinde kórshi Reseı, Qyrǵyzstan, О́zbekstan, sondaı-aq Germanııa, Avstrııa, Belgııa, AQSh, Danııa jáne Indonezııa elderinen kelgen bolatyn», - dedi marafonnyń sport dırektory Alekseı Sıdorenko.
Alaıda bıyl uıymdastyrýshylar júgiris baǵytyn ózgertti. Eger alǵashqy úsh jylda qatysýshylar saıabaq pen Esil ózeniniń jaǵalaýynan júgirip ótse, onda qazirgi tańda saıabaqtan shyǵý, qalanyń 4 kóshesi jáne Esil jaǵalaýymen júgirý baǵyty bekette tur. Máre - saıabaqtyń Trıatlon ortalyǵy.