«Elimizde jastar saıasatyn júzege asyrýǵa belsendi úles qosyp júrgen bilikti jas maman Dáýlet Káribek «Nur Otan» partııasy janyndaǵy «Jas Otan» jastar qanatynyń tóraǵasy bolyp saılandy. Onyń kandıdatýrasyn «Jas Otan» jastar qanaty Ortalyq keńesiniń otyrysynda keńes músheleri biraýyzdan qoldady.
Dáýlet 2017 jyldan beri «Jas Otan»-nyń atqarýshy hatshysy retinde nátıjeli eńbek etip, tabandylyǵymen tanylǵan maman. Sonyń nátıjesinde «Daryn» memlekettik syılyǵynyń laýreaty atanyp, «Nur Otan» partııasy Saıası keńesiniń múshesi bolyp saılandy.
Taıaýda ǵana ótken partııamyzdyń kezekten tys XIX sezinde elimizdiń jastary atynan sóz sóılep, birqatar tyń bastamalar usyndy. Sondyqtan Dáýletti jańa qyzmetimen quttyqtaı otyryp, onyń ózine júktelgen mindetti múltiksiz oryndaıtynyna senim bildiremin», - dep jazdy Máýlen Áshimbaev.
Onyń atap ótýinshe, osy ýaqytqa deıin «Jas Otan»-nyń tóraǵasy bolyp kelgen Danııar Súndetbaev shetelde bilimin jetildirý týraly sheshimine baılanysty bul qyzmetten óz erkimen bosatyldy. Ol tóraǵalyq etken eki jylda partııanyń jastar qanaty jańa deńgeıge kóterilip, otandyq jas býynnyń naǵyz ortalyǵyna aınalǵan. Osy kezeńde «Jas Otan»-nyń IV sezi ótip, jastar qanatynyń Ortalyq keńesi jasaqtalǵan.
«Endi sanaýly kúnderden keıin Prezıdent saılaýynyń úgit-nasıhat jumystary bastalady. Osy aýqymdy ári el damýyndaǵy mańyzdy kezeńde partııamyzben birge «Jas Otan» jastar qanatyna da zor jaýapkershilik júktelip otyr. Sebebi partııa tájirıbesinde alǵash ret Prezıdent saılaýy kezinde kandıdatymyzdyń Respýblıkalyq qoǵamdyq shtabymen birge onyń jastar qanaty da qurylady. Sondyqtan partııamyzdyń jastar qanatyna osy senimdi abyroımen aqtap, el damýy jolynda eseli eńbek etýine tilektestigimdi bildiremin», - dep atap ótedi ol.