«Baqytty balalyq shaq» atty festıvaldiń ashylýyna QR Bilim mınıstrliginiń Respýblıkalyq oqý-ádistemelik ortalyǵynyń jetekshisi Baqyt Álibaeva men oblystyq bilim basqarmasynyń basshysy Maıra Meldebekova qatysyp, oqýshylardyń jaqsy demalýlaryna sáttilik tiledi. Aral aýdany ákiminiń orynbasary Mereı Meıirbekov baldyrǵandardy jazǵy demalys maýsymynyń ashylýymen quttyqtady.
Saltanatty sharaǵa qatysýshylar oqýshylardyń qolóner buıymdarynyń jáne robototehnıka kórmesin tamashalady.
Merekelik konsertte oqýshylar sharlarǵa tilekterin jazyp, aspanǵa ushyrdy.
Bıylǵy jyly «Qambash» tynyǵý lagerinde 1100 oqýshynyń jazǵy demalysyn uıymdastyrý josparlanǵan. Qazirgi tańda birinshi aýysymda 130 bala qabyldanyp, tynyǵyp jatyr.
Kól jaǵalaı ornalasqan lagerde fýtbol, voleıbol, basketbol, ústel tennısi, robototehnıka úıirmeleri jáne «Temirshi» debat klýby men «Jas qyran» áskerı-patrıottyq klýbtary jumys isteıdi.