Senbi, 27 sáýir 2013 2:27
«…Sessııalardyń birinde men Parahat Hadjımetovaǵa «Birlik» medalin tapsyrdym. Ol 67 jasta, 10 gektar jerge baý-baqsha salyp, osynyń esebinen balalar úıine 156 balany ósirýge kómektesip júr! Bul naǵyz patrıot! Biz osyndaılarǵa kómektesýge tıispiz! Bul barsha úshin úlgi!»
Senbi, 27 sáýir 2013 2:27
«…Sessııalardyń birinde men Parahat Hadjımetovaǵa «Birlik» medalin tapsyrdym. Ol 67 jasta, 10 gektar jerge baý-baqsha salyp, osynyń esebinen balalar úıine 156 balany ósirýge kómektesip júr! Bul naǵyz patrıot! Biz osyndaılarǵa kómektesýge tıispiz! Bul barsha úshin úlgi!»
Elbasymyz, Qazaqstan halqy Assambleıasynyń Tóraǵasy Nursultan Nazarbaev «Qazaqstan-2050» Strategııasy: bir halyq – bir el – bir taǵdyr» taqyrybynda ótken Qazaqstan halqy Assambleıasynyń mereıtoılyq HH sessııasynda Ońtústikten shyqqan osynaý eńbekqor áıeldi, kópbalaly anany osylaısha aıryqsha atap ótti. Shynynda Ońtústik jurty Parahat apaıdy óte jaqsy tanıdy. Ol kisi elge iskerlik qasıetimen, adal eńbegimen, baýyrmal júregimen, qaıyrymdylyq isterimen keńinen tanymal.
– Keı kezderi balalarym «Apa, qartaıdyńyz, eńbek etýdi qoıyńyz, typ-tynysh, jaıbaraqat ómir súrseńizshi» degendi aıtady, – deıdi bizben áńgimesinde Parahat Hadjımetova. – Men osy eńbekpen kórkeıdim, osy eńbektiń arqasynda abyroı jınadym. Endeshe, kúsh-qýatym barda qalaısha eńbekten qol územin?! Árıne, balalarym maǵan jany ashyǵandyqtan aıtady. Biraq, men eńbekpen egiz óstim. Eńbek etýden lázzat alamyn. Búginde Saıram aýdanyndaǵy Qaramurt aýylynda 13 gektar jerim bar. Baý-baqsha ekkenbiz. 3 jyl boldy, alma baǵym jaqsy ónim berip jatyr. Alla qalasa, bıyl da ónim mol bolatyn túri bar. Eń bastysy – adamnyń peıilinde. Men ekken alma baǵy bárine jetedi, satýǵa da, dastarqanǵa qoıýǵa da, jetim-jesirlerge taratyp berýge de. Odan bólek, Qaramurtta 40-50 jylqy malyn baǵyp otyrmyz.
Osy Saıram aýdanyndaǵy jetim balalar úıine kóp jyldan beri demeýshi bolyp kelemin. Qolymnan kelgeninshe osy úıde tárbıelenip jatqan balalardyń joq-jitigin túgendep júremin. Kompıýter, basqa da kerek-jaraqtaryn áperdim. Qazir men demeýshilik kórsetken, ıaǵnı osy balalar úıinde mektepti úzdik bitirgen eki balamnyń bireýi Amerıkada, bireýi Astanada joǵary bilim alyp júr. Astanadaǵysy ótken jazda Amerıkada is-tájirıbeden ótip keldi. Olardy únemi demep, járdem kórsetip otyramyn. Budan basqa turmysy nashar otbasylarǵa, meshitterge qaraılastym.
15 márte qajylyqqa bardym. Ár barǵan saıyn shyn nıetimmen Alladan elimizdiń, Prezıdentimizdiń amandyǵyn tileımin. Elbasymyz shyn máninde Allanyń nury jaýǵan adam. Sol kisiniń salıqaly saıasatynyń arqasynda búginde Qazaqstandy álem tanydy. Elbasy nebir qıyndyqtar men synaqtardy eńserip, eldi ilgerileý men órkendeý jolyna abyroımen alyp shyqty. Qýatty ekonomıkasy, serpindi saıası júıesi bar elmiz. Eń bastysy – búgini men erteńi jarqyn. Qazaqstannyń eli de, jeri de baı. Kóńili darqan. Bizge qazir bir-aq nárse kerek. Ol – aýyzbirlik. Eger tatýlyq, yntymaq, birlik bolsa, bereke de, mereke de kóp. Birigip eńbek etkende ǵana nátıjeli isterge qol jetkizemiz.
Jazyp alǵan
Oralhan DÁÝIT,
«Egemen Qazaqstan».
Ońtústik Qazaqstan oblysy.