Beısenbi, 2 mamyr 2013 1:59
Astana qalasynda ótken Qazaqstan halqy Assambleıasynyń sessııasynan oralysymen mańǵystaýlyq delegasııa músheleri shattyq sharalaryna kirisip ketti. Yntymaq pen birlikten asqan baqyt joq ekendigin, táýelsiz Qazaqstannyń shańyraǵyn bıik etý úshin ózderiniń nyq ýyq bolýy qajettigin jaqsy túsinetin olar 1 mamyr merekesi qarsańyn kóterińki kóńil-kúı syılaıtyn saltanatty sharalarǵa toltyrdy.
Beısenbi, 2 mamyr 2013 1:59
Astana qalasynda ótken Qazaqstan halqy Assambleıasynyń sessııasynan oralysymen mańǵystaýlyq delegasııa músheleri shattyq sharalaryna kirisip ketti. Yntymaq pen birlikten asqan baqyt joq ekendigin, táýelsiz Qazaqstannyń shańyraǵyn bıik etý úshin ózderiniń nyq ýyq bolýy qajettigin jaqsy túsinetin olar 1 mamyr merekesi qarsańyn kóterińki kóńil-kúı syılaıtyn saltanatty sharalarǵa toltyrdy.
Kıeli Mańǵystaý óńiri – qashannan birneshe ulttyń urpaǵy órbigen altyn besik. Qazaqqa tán qonaqjaılyqpen ózge ulttarǵa qushaǵyn ashyp, qıyndyqtardan qol ustasyp birge shyqqan olar azat eldiń araıly tirligin birge keshýde. Mańǵystaý jerin zertteý úshin nemese jer aýdarý arqyly kelý sekildi arǵy tarıhtyń keıbir derekterin aıtpaǵanda, beridegi túbektegi ken oryndaryn barlaý, munaıdy ıgerý, Aqtaý qalasynyń irgetasyn qalaý syndy súbeli isterdiń basynda jergilikti ultpen birge ózge ult ókilderiniń qajyr-qaıraty turǵandyǵyn aıtýymyz kerek.
«Bir shańyraq astynda» dep urandatqan Mańǵystaý oblystyq Assambleıa hatshylyǵy men etnomádenı birlestikter tóraǵalary birlik merekesi men Mańǵystaý oblysynyń – 40, Aqtaý qalasynyń 50 jyldyq mereıtoılaryn toılaýdy sáýirdiń sońyna taman bastap ketti. Bul qýanysh sanatynan oblys pen oblystyq Assambleıa hatshylyǵynyń ózara birlese jumys isteýiniń 10 jyldyǵy da qalys qalǵan joq. On jyl boıy dostyqtyń uıasyndaı bolyp kelgen qaladaǵy №6 mektepte etnomádenı birlestikterge arnalyp kórme daıyndalyp, ár ulttyń kıimi kıilip, áni shyrqaldy. Ásirese, birneshe ult ókilderiniń qazaqsha «Jasa meniń qazaǵym, jasa Qazaqstanym!» dep hormen terbele án shyrqaǵany áserli shyqty.
Mańǵystaý oblystyq jastar saıasaty ortalyǵy men qaladaǵy 4 orta kásiptik bilim mekemelerinde bolyp, jastarmen júzdesti. «El birligi – erteńimiz» taqyrybyndaǵy kezdesýde jastarǵa qazaq tarıhy, elimizdiń qazirgi damý úrdisi, Assambleıa men onyń qurylymy, ultaralyq jáne dinı tatýlyq turǵysynda túsinik berdi. «Memlekettik til – meniń tilim» baıqaýynda 15-30 jas aralyǵyndaǵy 24 úmitkerdiń qazaq tilin bilýin sarapqa salǵan uıymdastyrýshylar bul baıqaýda lezgın, qumyq, ázerbaıjan, orys, ýkraın, belarýs jastarynyń arasynan tabyldy.
– IID-niń «Kúzet» mekemesi men Qazaqstan Respýblıkasy UQK Shekara qyzmeti «Batys» óńirlik basqarmasy ózderine shaqyryp Qazaqstan qoǵamyndaǵy ultaralyq kelisim taqyrybynda dáris oqýdy ótinish etti. Qazir Assambleıa hatshylyǵy men etnomádenı birlestikter tóraǵalary osy dáristerdi oqý ústindemiz, – deıdi qashanda zyr júgire qyzmet etip, tatýlyqqa dáneker bolyp júretin, joǵaryda aıtylǵan búkil sharanyń uıymdastyrýshysy – Mańǵystaý oblystyq Qazaqstan halqy Assambleıasy hatshylyǵynyń tóraıymy Gúljan Ismýrzına.
Mańǵystaýlyqtar dostyq merekesin kúnilgeri osylaı bastap ketkenine kópshilik kýá.
Gúlaıym ShYNTEMIRQYZY,
«Egemen Qazaqstan».
Mańǵystaý oblysy.