Sársenbi, 13 aqpan 2013 7:13
Úshinshi ret ıadrolyq synaq jasady
Soltústik Koreıa úkimeti keshe jerasty ıadrolyq synaǵy tabysty ótkizilgenin resmı túrde málimdedi. Onyń ústine Phenıandaǵylar jaı ıadrolyq bomba emes, joǵary qýatty shaǵyn ıadrolyq zarıad synaqtan ótkizilgenin atap kórsetti. KHDR basshylyǵynyń málimdeýinshe, synaq tehnıkalyq jaǵynan tabysty bolǵan.
Sársenbi, 13 aqpan 2013 7:13
Úshinshi ret ıadrolyq synaq jasady
Soltústik Koreıa úkimeti keshe jerasty ıadrolyq synaǵy tabysty ótkizilgenin resmı túrde málimdedi. Onyń ústine Phenıandaǵylar jaı ıadrolyq bomba emes, joǵary qýatty shaǵyn ıadrolyq zarıad synaqtan ótkizilgenin atap kórsetti. KHDR basshylyǵynyń málimdeýinshe, synaq tehnıkalyq jaǵynan tabysty bolǵan.
KHDR-diń ıadrolyq synaq jasaǵanyn óz kezeginde Ońtústik Koreıa da rastady. Bul jóninde Ońtústik Koreıa prezıdenti ákimshiligine silteme jasaı otyryp, «Reıter» agenttigi habarlady. Seýl kórshileriniń is-áreketin jazǵyryp qana qoımaı, ony arandatýshylyq dep atady. Ońtústik Koreıanyń ótinishi boıynsha Nıý-Iorkte BUU Qaýipsizdik Keńesiniń Phenıannyń ıadrolyq synaqtaryna arnalǵan jedel májilisi ótkiziletin boldy.
Tártipsizdiktermen atap ótti
Mysyrdyń astanasy – Kaır qalasynda prezıdent Hosnı Múbáraktiń bılikten ketirilgeniniń ekinshi jyldyǵyna arnalǵan sherý bolyp ótti. Sherý aksııaǵa qatysýshylardyń polısııamen jappaı qaqtyǵysyna ulasty. Prezıdent saraıy janynda birneshe ondaǵan demonstrant qazirgi prezıdent Mohammed Mýrsıdiń otstavkaǵa ketýin talap etti.
Sherýshiler óz talaptaryn polısııaǵa qarsy tas atýmen «nyǵaıtpaq» boldy jáne rezıdensııaǵa kireberisti jaýyp tastaýǵa áreket jasady. Polısııa buǵan qarsy sýatqysh jáne kózden jas aǵyzatyn gaz qoldanyp, demonstranttardy alańnan yǵystyryp shyǵardy. Sóz retinde aıta ketsek, Egıpetti 30 jylǵa jýyq ýaqyt basqarǵan Hosnı Múbárak 2011 jyldyń 11 aqpanynda otstavkaǵa ketýge májbúr bolǵan edi.
Eýroodaqtyń Ýkraınaǵa 19 talaby
Ýkraınanyń «Glavkom» portaly Ýkraınanyń Eýroodaqpen yntymaqtasýy úshin qajet jáne oryndalýy talap etiletin 19 krıterııdi jarııalady. Osyndaı tizim bar ekeni týraly aqparat buǵan deıin de BAQ-tarda kórinis berip qalǵan edi. Bul tizimniń resmı ataýy joq, ol tek «19 ındıkator» retinde qaperge salynady.
Al tizimge Ýkraınadaǵy saılaý júıesin jaqsartý, mılısııa men memlekettik qarjy júıelerin reformalaý, jemqorlyqpen tıimdi kúresti qamtamasyz etý sııaqty krıterııler engizilipti. Birneshe krıterııdiń sot óndirisine qatysy bar. Degenmen, Eýrokomıssııadaǵylar tizimniń resmı mártebege ıe emes ekenin kóldeneń tartady. Alaıda joǵarydaǵy krıterııler Ýkraına men EO arasynda 2011 jyldyń aıaǵynda qol qoıylady dep kútilgen jańa shartqa kúni búginge deıin kesirin tıgizip keledi.
Shekarasyn jabyq dep jarııalady
Lıvııa premer-mınıstri Alı Zeıdan el 14-18 aqpan aralyǵynda 5 kúnge óziniń Mysyrmen jáne Týnıspen shekarasyn jabatynyn jarııa etti. Premer mundaı sheshimniń sebebin Lıvııa kósemi Mýammar Kaddafıdi taǵynan taıdyrýǵa alyp kelgen qarýly qaqtyǵystyń 2 jyldyǵyna oraı erekshe saqtyq qajettigimen túsindirdi.
Kóterilis 17 aqpanda bastalǵanymen, jyldyqty toılaý 15 aqpanda arna tartatyn kórinedi. Lıvııanyń kóptegen turǵyndary, ásirese, eldiń shyǵysyndaǵylar sondaı-aq osy kúnge deıin lıvııalyqtardyń qaýipsizdigin qamtamasyz ete almaı otyrǵan jáne eldiń jańa konstıtýsııasyn qabyldaýǵa qol jetkize almaı kele jatqan úkimetke qarsy narazylyq aksııalaryn uıymdastyrýdy da josparlap otyrsa kerek. Qaýipsizdik sharalary qarastyrylýda.
Syrttaı 24 jylǵa sottaldy
Bishkek garnızonynyń áskerı soty eldiń burynǵy prezıdenti Qurmanbek Bakıev pen onyń baýyry, burynǵy memlekettik kúzet qyzmetiniń bastyǵy Janysh Bakıevke qatysty syrttaı úkim shyǵardy. Aǵaıyndylar ókilettikterin asyra paıdalanǵandary jáne basqa da qylmystary úshin kináli dep tabylǵan.
Sóıtip, burynǵy prezıdent 24 jylǵa bas bostandyǵynan aırylsa, onyń baýyry ómir boıy túrmede otyrýǵa kesilgen. Áskerı sottyń aqparatynda Bakıevterdiń ne úshin sottalǵandary naqtylanbaıdy. Q.Bakıevtiń 2010 jylǵy tóńkeristen keıin taǵynan taıdyrylǵany belgili. Sol kezdiń ózinde-aq ol Belorýssııaǵa qashyp úlgergen bolatyn. Qyrǵyzstannyń jańa bıligi ony qaıtarýǵa talpynǵanymen, olarynan túk shyqpaǵan edi.
Alǵashqy spýtnıgine án arnady
Ázerbaıjannyń alǵashqy telekommýnıkasııalyq Jer serigi 8 aqpanǵa qaraǵan túni orbıtaǵa shyǵarylǵan bolatyn. Ol TMD, Shyǵys Eýropa, Soltústik Afrıka, Ortalyq jáne Shyǵys Azııa elderindegi tutynýshylarǵa qyzmet kórsetedi. Baký spýtnık resýrsynyń shamamen 20 paıyzyn paıdalanyp, qalǵanyn «halyqaralyq rynokta júzege asyrý nıetinde».
El prezıdenti Ilham Alıev spýtnıktiń ushyrylýyn tarıhı oqıǵa jáne ázerbaıjan halqynyń úlken tabysy dep atasa, oǵan arnap án shyǵaryldy. Kompozısııa «Bizdiń ulttyq spýtnıgimiz» dep atalady. Sózin jazǵan eńbek sińirgen óner qaıratkeri, polkovnık, aqyn jáne pýblısıst Abdýlla Gýrbanı, al sazyn jazǵan KSRO halyq ártisi, professor Arıf Melıkovtyń shákirti Narmına Nagıeva.
Qysqa qaıyryp aıtqanda:
Qańtar aıynyń sońynda qastandyq jasalǵan Armenııa prezıdenttigine kandıdat Parýır Aırıkıan aýrýhanadan shyǵaryldy. Biraq ol tekserilý úshin kún saıyn aýrýhanaǵa kelip turýy tıis kórinedi. 18 aqpanǵa belgilengen saılaý atalǵan oqıǵaǵa baılanysty 2 aptaǵa shegerilgen-tin.
Reseı prezıdenti Vladımır Pýtın Memdýmaǵa sheneýnikterdiń shetel bankterinde aqsha ustaýlaryna tyıym salatyn zań jobasyn engizdi. Zań jobasy sheneýnikterdiń shetelderde aktıvter ıelenýimen kúreske baǵyttalǵan. Muny buzǵany úshin 5-ten 10 mln. rýblge deıin aıyppul salý nemese 5 jylǵa deıin bas bostandyǵynan aıyrý jazasy qarastyrylady.
Reseıdiń Komı respýblıkasynyń basshysy Vıacheslav Gaızer «Vorkýtınskaıa» shahtasyndaǵy jarylystan qaza tapqan kenshilerge baılanysty úsh kúndik aza tutý jarııalady. 800 metr tereńdiktegi metan jarylysynan 18 kenshi opat bolǵan edi.
Reseı lıberaldarynyń serkesi Vladımır Jırınovskıı partııadaǵy temeki tartatyndardyń barlyǵyn partııadan qýyp shyǵýǵa ýáde berdi. Osyndaı málimdemeni ol Memdýmanyń májilisinde jasady. Memdýmada temeki tartýǵa qarsy zań jobasy talqylanǵan bolatyn.
Internet materıaldary negizinde daıyndaldy.