Petropavl qalasynda konsýltatıvtik-dıagnostıkalyq ortalyǵy bar 500 tósek-oryndyq kópbeıindi oblystyq aýrýhana qurylysynyń jobasy týraly qujatqa Soltústik Qazaqstan oblysynyń ákimi Q. Aqsaqalov pen «YDA Holding» túrik kompanııasynyń basqarma tóraǵasy A. Hýseın qol qoıdy. Aýrýhana kesheni 7 kópbeıindi, tozǵan jáne bólek-bólek nysandardyń ornyna salynatyn bolady.
Taǵy bir kópbeıindi aýrýhana Túrkistan qalasynda salynady. Túrkistan oblysynyń ákimi О́. Shókeev, «BI-Holding» kompanııasy konsorsıýmy baqylaýshy keńesiniń tóraǵasy A. Rahymbaev jáne «YDA Holding» túrik kompanııasynyń basqarma tóraǵasy A. Hýseın 610 tósek-oryndyq kópbeıindi oblystyq medısınalyq ortalyq qurylysynyń jobasy boıynsha ózara yntymaqtastyq týraly qujatqa qol qoıdy. Aýrýhanada onkologııalyq jáne kardıologııalyq bólimder, perınataldi ortalyq, jedel medısınalyq járdem stansııasyn jáne t.b ashý kózdelgen. Nysan qurylysyn 2022 jyly aıaqtaý josparlanǵan.
Qurylysqa, eki medısınalyq nysandy jabdyqtaýǵa tartylatyn ınvestısııalardyń jalpy kólemi 110 mlrd teńgege jýyq somany quraıdy.
Aıta keteıik, bul jobalar densaýlyq saqtaý ınfraqurylymdaryn damytýdyń óńirlik perspektıvaly josparlary aıasynda iske asyrylady.
Investor kompanııanyń basqarma tóraǵasy A. Hýseın atap ótkendeı, Qazaqstandaǵy ınvestısııalyq ahýal qolaıly jáne ınvestorlar úshin jobalardy júzege asyrýyna barlyq jaǵdaılar jasalǵan.
Qabyldanyp jatqan sharalar elimizdiń aýrýhana sektorynyń ınfraqurylymyn jańartyp, ishki suranysty qanaǵattandyryp, kórsetiletin medısınalyq qyzmetterdiń sapasyn, qoljetimdiligin jáne ýaqyttylyǵyn arttyrady, sondaı-aq Ortalyq Azııa men TMD elderi úshin medısınalyq týrızm ortalyǵyna aınalýǵa múmkindik beredi.