Otyrysta ulttyq ekonomıka mınıstri Rýslan Dálenov pen qarjy mınıstriniń birinshi orynbasary Berik Sholpanqulov bıýdjettiń kiris bóligin qalyptastyrý jáne ulǵaıtý jónindegi memlekettik organdardyń usynystary týraly baıandady. Bıýdjet túsimderin ulǵaıtý jóninde usynylǵan sharalardyń ishinen túsetin salyqtardy (jeńildikter men preferensııalardy) retteý; sheteldik kompanııalardyń kiristerin baqylaý; salyqtyq jáne kedendik ákimshilendirýdi jetildirý máseleleri atap ótildi.
Senat Tóraǵasy birqatar syn-eskertpeler men usynystar aıtty. Darıǵa Nazarbaeva birinshi kezekte Esep komıtetin kúsheıtý jáne Ekonomıkalyq tergeý qyzmetiniń tıimdiligi máselesine oraı taldaý jasalýy kerek dep sanaıdy.
D. Nazarbaevanyń pikirinshe, sýbsıdııalar, jeńildikter men preferensııalar saıasatyna degen kózqarasty da túbegeıli ózgertý kerek ári zańdy túrde bekitý qajet. Sondaı-aq, salyqtyq jáne kedendik ákimshilendirýdi aqparattandyrý týraly da usynys aıtyldy. «Barlyq memlekettik organdar, azamattyq qyzmetter jáne basqalar qazirgi zamanǵy aqparattyq júıelerdi engizýdiń sapasyna, olardyń ýaqytyly jáne ortaq aqparattyq júıege kirigýine jekeleı jaýapty bolýy tıis. Ýaqytqa qatań shekteýler men oryndalmaǵany úshin jaýapkershilik belgileý kerek», - dedi Senat basshysy.
D. Nazarbaeva sondaı-aq problemalyq máseleleriniń qatarynda halyqtyń shamadan tys nesıe alýyn, memlekettiń ekonomıkaǵa qatysýyn atap ótti.