Juma, 5 sáýir 2013 2:09
Kóktemge salym qyrǵyz aǵaıyndardyń arasynda belsendilik kúsheıedi. Buǵan deıin eki ret revolıýsııa bolyp, prezıdentterin shetelge qýyp tastaǵan. Bıyl da revolıýsııa bolýy múmkin dep joramal aıtý qıyn, biraq halyqtyń belsendiligi kúsheıgeni anyq.
Juma, 5 sáýir 2013 2:09
Kóktemge salym qyrǵyz aǵaıyndardyń arasynda belsendilik kúsheıedi. Buǵan deıin eki ret revolıýsııa bolyp, prezıdentterin shetelge qýyp tastaǵan. Bıyl da revolıýsııa bolýy múmkin dep joramal aıtý qıyn, biraq halyqtyń belsendiligi kúsheıgeni anyq.
Kóktem ońtústikten bastalady, belsendilik te eldiń ońtústiginen ańǵaryldy. Jalalabad jáne Osh oblystarynda ol aıqyn kórindi. Mıtıng, sherýler óz aldyna, jalalabadtyqtar 24 naýryzda quryltaı da ótkizip tastady. Ony Bakıevtiń zamanynda bılikte bolǵan Úsen Syzdyqov uıymdastyryp, 15 myń adamnyń basyn qurady. Onda «El úni» qozǵalysy qurylyp, qazirgi bılikti aıyptaǵan sheshim qabyldady. Aıyptyń úlkeni – qazirgi basshylar naýryz jáne sáýir revolıýsııalarynan qorytyndy jasamaǵan, parlamenttik bılik «qaıtadan avtorıtarlyq prezıdenttik bılikke oıysyp bara jatyr». Naqty talap: byltyrǵy jylǵy 3 qarashada «memlekettik tóńkeris jasaý áreketin» uıymdastyrýshylar – «Atajurt» partııasynan depýtattar Qamshybek Tashıev, Talant Mamytov jáne Sadyr Japarovtardy qamaqtan bosatyp, «Qumtór» altyn ken ornyn sheteldikterden memleket menshigine alý boldy.Bul bir búgin aıtylyp júrgen nárse emes, birazdan beri sóz bolyp júrgen jaı. Endi oǵan oppozısııa halyqtyq sıpat berýge tyrysyp otyr. Bul jerde olar túrli aıla-sharǵydan da taıynar emes. Sońǵy kezde túrli saıası sharalarǵa áıel azamattardy kóptep qatystyryp qana qoımaı, solarǵa sóz aıtqyzý ádetke aınalyp bara jatqandaı. Qyrǵyz, qazaq – anany qadirlegen halyq, olardyń aıtqan sózi jerge tastalmaıdy. Keıde bir el arasynda qantógiske soqtyrǵandaı jaǵdaı qalyptasyp, eki jaq sharpysqaly turǵanda, qolyna aq jaýlyǵyn alyp, ananyń jurtty qyrqysýdan qutqarǵan kezi de bolǵan. Al mundaǵylar ózderiniń lastaý isterine ananyń aq peıilin paıdalanǵysy keledi, ózderiniń josyqsyz talaptaryn aq jaýlyqty ananyń, qart keıýananyń aýzyna salady.Qyrǵyzstan prezıdenti Almazbek Atambaev eldiń ońtústigin aralaǵan kezde osyndaı jaǵdaıǵa kezdesipti. Kim biledi, óziniń bedeline sendi me eken, jurtty tynshytýdy oılaǵany anyq qoı, prezıdent halyqpen tikeleı kezdesýdi josparlaǵan. Biraq bul jospary júzege aspapty. Túrli belsendilerdiń yqpalynda júrgen halyq óz prezıdentin tyńdaı qoımaǵan. Basty talap: «Atajurt» partııasynyń qamaýda jatqan depýtattaryn bosat deıdi. Prezıdenttiń olardyń aq-qaralyǵyn zańǵa súıenip, sot sheshedi degen sózin qabyldamaıdy. Jalalabad ortalyq alańyna jınalǵandar atynan sóılegender: «Sen ózińniń jarlyǵyńmen olarǵa keshirim jasaı alasyń, Jarlyǵyńdy osy jerde shyǵar», dep aıqaılaǵan. Prezıdenttiń «Zańdy syılaıyq, sotty tyńdaıyq. Zań aldynda jurttyń bári teń – depýtat ta, mınıstr de, qarapaıym adamdar da, prezıdent te», – degen sózin eshkim estigisi kelmegen.Zań demekshi, ótken juma kúni «Atajurt» partııasynyń depýtattaryna jáne olardyń joǵarǵy keńestiń ǵımaratyna kúshpen kirmek bolǵan áreketterin qoldaǵandarǵa sot boldy. Sot úıiniń mańynda «burynǵy depýtattardy» jaqtaýshylardyń 200 adam qatysqan mıtıngisi ótipti. Soǵan qaramaı, sot úkim shyǵarǵan. Sirá, oppozısııa áreketteriniń yqpaly da bolǵan-aý shamasy, jaza jeńildeý kórinedi. Memlekettik aıyptaýshylar Tashıevti – 10 jylǵa, Mamatovty 9 jylǵa sottaýdy surasa, sot olardy tıisinshe 1,5 jáne 1 jyl erkinen aıyrýǵa kesipti. Biraq jazanyń aty – jaza.Bul eldegi saıası belsendiliktiń sıpatyna qaraǵanda, sottyń bul sheshimi de alda talaı aıqaıǵa negiz bolar deısiń. Aǵaıyn elde aıqaı kóp bolyp jatady. Jurttyń belsendi bolǵany da, óz oılaryn bildirgeni de jaqsy. Tek onyń saıası oıynǵa aınalǵany jaqsy emes-aý. Al jurttyń álde bir bılikqumarlardyń oıynshyǵyna aınalǵany múlde jaqsy emes.
Mamadııar JAQYP, «Egemen Qazaqstan».