Seısenbi, 16 sáýir 2013 2:19
Chavestiń murageri jeńiske jetti
Jeksenbi kúni Venesýelada ótken prezıdenttik saılaýda bılik partııasynan kandıdat Nıkolas Madýro jeńiske jetti. Bul jóninde keshe «Reıter» aqparat agenttigi daýys berýdiń resmı nátıjesine silteme jasaı otyryp habarlady.Eldiń ulttyq saılaý komıssııasynyń málimetteri boıynsha, Nıkolas Madýrony saılaýshylardyń 51 paıyzy qoldaǵan. Al onyń basty básekelesi oppozısııadan prezıdenttikke kandıdat Enrık Kaprıleske saılaýshylardyń 49 paıyzy daýys bergen. «Búgin biz saılaýda ádil jeńiske jettik dep aıta alamyz», – depti Madýro daýys berýdiń resmı nátıjesi jarııalanǵannan keıin.
Otyz tórt adam opat boldy
Somalı astanasy – Mogadısho qalasynda bolǵan terrorlyq áreketten 34 adam opat bolyp, ondaǵan turǵyn jaralandy. «Frans-press» agenttiginiń habarlaýynsha, jarylystar sot ǵımaraty ornalasqan aýmaqta jasalǵan.Aqparat kózderine qaraǵanda, terrorlyq áreketter jaýapkershiligin «Ál-Kaeda» uıymymen baılanysy bar «Ál-Shabab» radıkaldy ıslam toby alǵan kórinedi. Osy toptyń ókili terrorlyq áreketter Somalıdi basqynshylardan azat etpeıinshe jalǵasa beretinin málimdepti. Sol kúni mundaı jarylystar el astanasyndaǵy áýejaıda da bolǵan eken. Sonyń saldarynan bes adam qaza tapqan. Onyń ekeýi túrkııalyq azamattar. Bul elde azamattyq soǵys 1991 jyldan beri jalǵasyp keledi.
О́zine ózi aıyppul saldy
AQSh-tyń Mıchıgan shtatyndaǵy Ionııa okrýginiń sýdıasy Raımond Voýt sot tyńdaýy ótip jatqanda, uıaly telefony qońyraýlatyp ketkennen keıin ózine ózi aıyppul saldy.Jergilikti basylymdardyń jazýynsha, sot otyrysy barysynda bir iske qatysty prokýror sóılep jatqan eken. Sol kezde sýdıanyń uıaly telefonyna kútpegen jerden qońyraý shalynyp, otyrysqa qatysýshylardy eleń etkizse kerek. Al sýdıa telefonynyń únin báseńdetýdi umytyp ketipti. Tyńdaý aıaqtalǵan soń, sýdıa Voýt sotqa qurmet kórsetpegeni úshin ózine ózi 25 dollar aıyppul salýǵa sheshim qabyldap, ony sol sátte kassaǵa tólepti. Sondaı-aq, ol kez kelgen sýdıa zańǵa qurmetpen qaraýǵa tıis ekenin de atap ótipti.
Zardap shekkender óz eline jetkizildi
«Interfaks» agenttiginiń habarlaýynsha, keshe Belgııada týrıstik avtobýstyń apatqa ushyraýy saldarynan zardap shekken reseılikter Volgograd qalasyna jetkizildi. Barlyǵy 26 adam, olardyń 14-i aýyr jaraqattarmen medısınalyq mekemelerge jatqyzyldy.Reseılik týrısterdi óz otanyna Tótenshe jaǵdaılar mınıstrligi ushaǵymen ákelgen. Belgııada zardap shekken taǵy alty adam qalyp otyr. Olardyń barlyǵy kámelettik jasqa tolmaǵandar, úsheýiniń densaýlyǵy aýyr. Volgograd oblysynyń balalary mingen týrıstik avtobýs Parıjden kele jatqanda, 14 sáýirde erteńgilik estakadadan qulap ketken. Apat saldarynan avtobýstaǵy 39 adamnyń beseýi qaıtys bolǵan edi.
Beıbit turǵyndar qaza tabýda
Sırııada úkimettik avıasııanyń soqqy berýi saldarynan 25 beıbit turǵyn qaza tapty. Olardyń jartysyna jýyǵy balalar. Bul jóninde keshe «Assosheıted press» aqparat agenttigi habarlady.Avıasoqqy Damaskidegi kóterilisshiler baqylaýyndaǵy aýdanǵa jasalǵan. Budan bólek úkimettik avıasııa eldiń ońtústik-shyǵysyndaǵy kúrdter turatyn Hadad derevnıasyn bombalaǵan. Onyń saldarynan 16 adam opat bolǵan sııaqty. О́tken jyly sırııalyq avıasııanyń shabýyl jasaýynan 4,5 myńnan astam beıbit turǵyn qaza tapty degen málimetter bar.
Ǵımarat 10,6 metrge jyljytylady
Bakýde qalanyń Fızýlı kóshesine ornalasqan tarıhı ǵımaratty 10,6 metrge jyljytý josparlanyp otyr. ARA agenttiginiń habarlaýynsha, bul jobany Nıderlandynyń Bresser Eurasia kompanııasy júzege asyrady.Kompanııa basshysy Leon Sveegerdiń aıtýynsha, daıyndyq jumystary 18 sáýirde aıaqtalady. Jobany júzege asyrýǵa 200-den astam gıdravlıkalyq apparat tartylady. Ǵımaratty jyljytýǵa bes kúndeı ýaqyt ketedi. Úsh qabatty turǵyn úı 1908 jyly salynǵan eken. Úıdiń uzyndyǵy – 52 metr, eni – 35 metr, bıiktigi – 20 metr. Onyń salmaǵy – 18 myń tonna. Ǵımaratty jyljytý kóshelerdi keńeıtý úshin qajet.
Qysqa qaıyryp aıtqanda:* AQSh-tyń burynǵy prezıdenti kishi Djordj Býsh alǵash ret nemereli boldy. Onyń qyzy Djennı ómirge qyz bala ákeldi.* Germanııa turǵyny lotereıadan 46 mıllıon eýro utyp aldy. Helsınkıde ótken bul lotereıa oıynyna Eýropadaǵy 14 eldiń turǵyndary qatysqan eken.* Qytaıdyń Hýbeı provınsııasyndaǵy qonaq úıden shyqqan órtten 14 adam mert bolyp, 47 adam zardap shekti.* Dýbaı soty tájikstandyq oppozısıoner ári saıasatker Ýmaralı Kývvatovty óz eline qaıtarý jóninde sanksııa berdi. Ol ótken jyldyń jeltoqsanynda BAÁ aýmaǵynda ustalǵan bolatyn.
Internet materıaldary negizinde ázirlendi.