Munda etti súıekten aıyrý jáne qaptaý jelisine jańadan jabdyq ornatylyp, maýsym aıynda bólshektelgen steık (Skin Pack) óndirisi ashyldy. Sonymen qatar ettiń mármárlik birizdiligin anyqtaýǵa múmkindik beretin qondyrǵy satyp alynyp, etti súıekten aıyratyn taǵy bir jeliniń jumysy jolǵa qoıyldy. Taǵy bir aıta keterligi, bir ýaqytta 1000 tonnaǵa deıin ónimdi saqtaýǵa qaýqarly Metro Cash & Carry dıstrıbıýtorlyq ortalyǵy salynypty.
– Mal sharýashylyǵy – ata kásip bolǵandyqtan odan túsetin kiristiń mólsheri de soǵan sáıkes bolýy quba-qup. Al búginde atalǵan salanyń el ekonomıkasy úshin aýqymy jáne mańyzdylyǵy munaı-gaz sektorynan kem emes, sondaı-aq onyń deńgeıine jetýge tolyq múmkindigi men qaýqary bar dep esepteımin. Elimizdiń qunarly jeri jáne baı dástúri, et óndirýshilerdiń álemdik kóshine ilese alatyndyǵyn aıǵaqtasa kerek, – dedi Kusto Group dırektorlar keńesiniń tóraǵasy Erkin Tátishev.
Kásiporynnyń bas dırektory Beıbit Erýbaev, jańa keshenniń ashylýy kompanııa tarıhyndaǵy aıtýly kezeń ekendigin ári ol otandyq et ındýstrııasyna tyńnan túren salatynyna senim bildirdi.
– Qazir ishki naryqtaǵy ettiń 70%-y qosalqy sharýashylyqtardyń úlesine tıesili. Osy rette sapasy joǵary ónimdi laıyqty baǵada satyp, jaǵdaıdy oń baǵytta ózgertkimiz keledi. Basty maqsat – azyq-túlik qaýipsizdigine basa mán berý. Tutynýshy esh qospasyz sapaly tabıǵı ónimmen qamtylýy tıis, – dep naqtylady KazBeef Group kompanııasynyń bas dırektory B.Erýbaev.
Arqanyń jazırasynda kásiporynǵa tıesili 120 myń gektar jaıylymdyq jer bar ekenin aıta ketken oryndy. Munda asyl tuqymdy angýs jáne gereford tóliniń 5 myńnan asa iri qarasy jaıylyp júr. Buǵan qosa kompanııa Zerendi aýdanynda qosymsha 5 myń mal basty bordaqylaýǵa arnalǵan oryndy qolǵa aldy. Onyń ústine bıyl osy úlgidegi taǵy bir alańdy iske qosý kózdelip, osy arqyly iri qaranyń sanyn 15 myńǵa jetkizý mejesi tur. Osylaısha, ishki naryqta óndirilgen mármár etiniń kólemi 6 myń tonnaǵa deıin jetkizilmek, deıdi et óńdeýshi keshenniń ókilderi. Atalǵan kásiporynnyń basty artyqshylyǵy – óndiriletin ónim FSSC 22000 halyqaralyq azyq-túlik qaýipsizdigi menedjementine sáıkes kelýinde jatsa kerek.
Jaqsylyq MURATQALI,
«Egemen Qazaqstan»