Shyn satırık «torǵaıdy zeńbirekpen atyp» áýre bop jatpaıdy. Jyly ıýmormen jymıtyp otyryp-aq, maqtanshaq, mansapqor ataýlyny maqtamen baýyzdaıdy. Bul – úlken óner. Qazir osy ónerdi ábden meńgerip, jurtshylyq kókeıindegisin dóp basyp júrgen satırıkterdiń biregeıi – Berik Sadyr. Onyń jaqynda ǵana memlekettik tapsyryspen shyqqan «E, báse» atty kitabynyń ár áńgimesi eriksiz ezý tartqyzady.
480 bettik qalyń kitap jeńil oqylady. Mundaǵy ázil-syqaq áńgimeler pende bolmysynyń qıqar-qıǵash minezderin ár qyrynan kórsete otyryp, qoǵamdaǵy kereǵarlyqtyń túp-tamyryna ájýa-mysqylmen silteme jasaıdy. Ár áńgimeden ózimizge «tanys ta beıtanys» kisilerdi jolyqtyramyz. Máselen, «Lıftige de til bitti» degen syqaq áńgimede ózgeni ǵaıbattaıtyndar syn tezine alynǵan. «О́zi joqtyń kózi joq» demekshi, ár qabatqa toqtaǵan saıyn, lıft ishindegiler jańa ǵana qasynda turǵan adamdy «neshe túrli pende bar-aý!» dep ǵaıbattaı jóneledi. Keıin sol kisini de basqalar sózben sybaıdy. Biraq kózinshe emes. Aqyr sońynda 12-qabatqa kóterilip ishi bosap qalǵan lıftige de til bitip, pendelerge ókpe-nazyn tógip salady. Osylaısha, avtor eshkimdi jazǵyrmaı-aq, oqyrman qolyna «aına ustata qoıady». Áńgimeden ózin kórgender ishteı qymsynyp, beti qyzarary sózsiz.
Jalpy, kúlkiniń bári kózge uryp, men mundalap turmaıdy. Qalypty bolyp ketken qubylystarǵa jasyrynyp, tyǵylyp júredi. Ǵalym Temirbek Qojakeev aıtpaqshy, «Iýmorlyq sezim ǵana komızmdi kez kelgen tyǵylǵan ininen sý quıyp sýyryp alyp, el aldyna súırep shyǵady, qaǵyp-silkip keleke etip, shańyn qaǵady». Satıra sardary Berik Sadyrdyń qaǵaberistegini qalt jibermeıtin qyrankóz baıqaǵyshtyǵy men sol baıqaǵanyn ázilmen árlendirip, «jaıpaǵyshtyǵy» kóńil qýantady. Máselen, «Jasasyn fonogramma!» degen syqaq áńgimesinde avtor jasandy daýyspen án aıtatyndardy ıronııa arqyly mazaqtyń otyna qaqtaıdy. Iá, bul áńgimeni oqyǵan adam qarqyldap kúlmeıdi. Ashy kúlki kómeıge kelip, keptelip qalady. Osy kúni eki saǵat án aıtsa da janyn jep aıtpaıtyn keıbir ánshilerge kózimiz de, qulaǵymyz da úırendi ǵoı. Sondyqtan da avtor bul máselege basqa qyrynan keledi. Osy bir satıralyq shyǵarmada janaza oqıtyn moldanyń ózi fonogrammanyń raqatyn kórip júr eken. Al bas keıipker bata men tilekti de jasandy daýyspen aıtatyn kúnge jetipti. Áńgime ásirelenip jazylsa da áserli, oqıǵasy nanymdy. О́ıtkeni satıra – úlkeıtkish áınek, ol árbir nársege lýpamen qaraıdy. Sóıtip, kúldirip otyryp, kúıdirip jiberedi. Al «Bilgir shákirtter» áńgimesinde jattandy, qurǵaq sóıleıtin uranshyl urpaq syn tezine alynǵan. Oqýshylardyń ne aıtqanyna emes, áıteýir sóılegenine rıza bolatyn keıbir muǵalimder de tikendi tilmen aıaýsyz áshkerelengen. Dıalogke qurylǵan áńgimede olardyń beınesi óz sózderinen-aq tanylady.
Satıralyq shyǵarmalarda barlyq adamnyń kem-ketigin boıyna jınaǵan tıptik beıne bolady. «Qyzym saǵan aıtamyn, kelinim, sen tyńda» degendeı jazýshy sol tıptik beınesin mazaqtaǵanymen, shyn máninde oqyrmanyn ájýalaıdy. Sol sekildi Berik Sadyrdyń Pyqyp esimdi keıipkeri – tıptik beıne. Avtor Pyqypty nuqyp otyrǵanymen, siz ben bizdi tuqyrtyp otyrǵanyn esten shyǵarmaıyq.