Aqtóbede kóshede paket ishinen tabylǵan jańa týǵan náresteni sábıler úıine aýystyrýǵa daıyndyq jumystary júrgizilip jatyr. Dárigerlerdiń aıtýynsha, balanyń jaǵdaıy birtindep jaqsaryp keledi. Nárestege Batyr esimi berilgen eken, dep jazady Egemen.kz.
Qazir sábı balalar aýrýhanasynda em qabyldap jatyr. Aýrýhanaǵa túsken kezde onyń salmaǵy 2 keli 900 gramm bolsa, búginde 3 keliden asty. Dárigerlerdiń aıtýynsha, balanyń jaǵdaıy áli de ortasha aýyr dep baǵalanǵanymen, barlyq taldaý nátıjeleri qalypty kórsetkishterge jetken.
Osydan shamamen 10 kúndeı buryn jańa týǵan náreste qala shetindegi aǵash túbinen tabylǵan.
Balany qurbysymen serýendep júrgen mektep oqýshysy baıqap qalǵan. Olar jedel járdemge jáne polısııaǵa habar bergen. Náresteniń anasy áli tabylǵan joq.
Astanada 19 jastaǵy boıjetken jańa týǵan sábıin satyp jibergen
Aqtóbe oblystyq densaýlyq saqtaý basqarmasy bóliminiń basshysy Alııa Sharbakovanyń aıtýynsha, sábıdiń salmaǵy jas ereksheligine sáıkes qalypty túrde ósip keledi. Qorǵanshylyq organdary men polısııa ókilderimen birlesip qajetti qujattar rásimdelip jatyr. Barlyq rásimder aıaqtalǵannan keıin bala «Úmit» balalar úıi mekemesine jiberiledi.
Eske salaıyq, buǵan deıin Pavlodar oblysynda jańa týǵan sábıin satpaq bolǵan áıeldiń zańsyz áreketi áshkerelengen.