Qazaqstannyń halyq ártisi Dımash Qudaıbergen «Taımas» kórkem fılminiń túsirilim alańyna baryp, shyǵarmashylyq toppen kezdesti. Kezdesý barysynda ol túsirilim tobyna qoldaý bildirip, aldaǵy jumysyna sáttilik tiledi.
«Taımas» – Ulttyq qaýipsizdik komıteti Shekara qyzmetiniń qajyrly eńbegine arnalǵan tuńǵysh otandyq kórkem fılm. Kartınany «i1team» kınokompanııasy Mádenıet jáne aqparat mınıstrliginiń tapsyrysymen Ulttyq kınony qoldaý memlekettik ortalyǵynyń qoldaýymen túsirip jatyr. Fılmniń rejısseri – Ǵalym Asylov.Kıno ortalyǵynyń basqarma tóraǵasy Qurmanbek Jumaǵalı Dımash Qudaıbergenge jobaǵa kórsetken qoldaýy men otandyq kınoǵa degen yqylasy úshin alǵys bildirdi.
«Elimizdi álemge tanytyp júrgen óner ıesiniń qoldaýy shyǵarmashylyq ujymǵa erekshe serpin beredi. Otanǵa qyzmet etý, jaýapkershilik pen shynaıy dostyq sekildi mańyzdy qundylyqtardy arqaý etken jobaǵa qoldaý kórsetkeni úshin Dımash Qudaıbergenge rızashylyq bildiremiz. Fılm kórermen júreginen oryn alyp, otandyq kınonyń damýyna eleýli úles qosady dep senemin», dedi Qurmanbek Jumaǵalı.
Aıta keteıik, «Taımas» jobasynyń túsirilim jumysy jýyrda bastaldy. Dástúr boıynsha alǵashqy túsirilim kúni «tárelke shaǵý» rásimimen belgilendi. Fılm oqıǵasy shekara qyzmetiniń ofıseri men Taı esimdi qyzmettik ıttiń tóńireginde órbıdi. Basynan ótken aýyr synaqty birge eńsergen olar ýaqyt óte kele kontrabandashylarǵa qarsy kúreste bir-birine arqa súıeıtin senimdi serikterge aınalady.
Jobaǵa arnaıy daıyndyqtan ótken qyzmettik ıtter qatysyp, al fılm keńesshileri retinde kásibı kınologter tartylǵan. Sonymen qatar kartınaǵa 2025 jyly Kıno ortalyǵy uıymdastyrǵan respýblıkalyq «JARQYRA» kastınginiń nátıjesinde iriktelgen akterler de qatysyp jatyr.