AQSh-tyń resmı tulǵalary Kongrestegi jabyq brıfıngte Mınab qalasynda ornalasqan qyzdarǵa arnalǵan mektepke soqqy jasaǵanyn moıyndady, dep habarlaıdy Egemen.kz NBC News-ke silteme jasap.
Vashıngton bastaýysh mektepke jasalǵan soqqy saldarynan 171 oqýshy qyzdyń qaza tapqanyna Izraıldiń qatysy joq ekenin aıtty.
Reuters agenttiginiń málimetinshe, AQSh áskeriniń tergeýshileri Irandaǵy mektepke jasalǵan soqqyny amerıkalyq áskerı kúshter júzege asyrǵan degen qorytyndyǵa kelgen. Agenttik atap ótkendeı, ázirge qorytyndy nusqa jasalǵan joq, tergeý resmı túrde aıaqtalmaǵan.
AQSh Qarýly kúshteriniń Ortalyq qolbasshylyǵynyń ókili bul oqıǵa boıynsha tergeý jalǵasyp jatqandyqtan, «jaǵdaıǵa qatysty pikir bildirý orynsyz bolatynyn» málimdedi.
Aıta keteıik, Irannyń Mınab qalasyndaǵy qyzdarǵa arnalǵan bastaýysh mektepke soqqy 28 aqpanda, AQSh pen Izraıldiń Iranǵa qarsy birlesken áskerı operasııasynyń alǵashqy kúni jasalǵan. Eldiń Bilim mınıstrliginiń málimetinshe, keminde 175 muǵalim men oqýshy qyz qaza tapqan.
Pentagon basshysy Pıt Hegset amerıkalyq áskerı kúshter eshqashan azamattyq nysandarǵa shabýyl jasamaıtynyn atap ótip, mektepke jasalǵan soqqy jan-jaqty tergelip jatqanyn aıtty.
AQSh-tyń Irandaǵy mektepke jasalǵan shabýylǵa qatysy bar ma?
Irannyń Fars agenttiginiń habarlaýynsha, Tegeran kinálilerdi anyqtap, jaýap sharalaryn daıyndap jatyr.