Alekseı Lodochnıkov – Ertis boıyndaǵy qalyń qazaqtyń arasynda ósken jigit. Bala kezinen júregi qazaǵym dep soǵady. Dombyramen halqymyzdyń án-kúıin quıqyljytyp oınaýy bir bólek, ol – búginde memlekettik til men ult mádenıetine olja salyp, kósegesin kógertsem deıtin sanasy sergek azamattyń biri.
Alekseı balalar úıinde tárbıelengen. Balalyq shaǵyn Pavlodar oblysy Tereńkól aýdanyndaǵy balalar úıinde ótkerdi. О́nerli jetkinshek 6 jasqa tolǵanda ustazdarynyń keńesimen daryndy balalarǵa arnalǵan mýzykalyq mektepke oqýǵa túsip, «Dástúrli án jáne dombyrada oınaý» mamandyǵyn ıgergen. Qazirgi kúni ol Instagram men TikTok jelilerinde tanymal blogerge aınalǵan. Búginde Astana qalasynda turady.
– Qazaq rýhanııatyna, mentalıtetine jaqyn bolýymnyń sebebi – balalar úıinde qazaq tobynda tárbıelendim. Qazaqy tárbıeniń nátıjesi bolar, eseıe kele aralasatyn joldastarymnyń barlyǵy qazaq. Dombyra úıretken alǵashqy ustazym Ashat Erkebulanov, odan keıin jol kórsetken Medǵat Manapov, Amangeldi Qojanov, Janbolat Baısoltan sııaqty aǵalaryma alǵysym sheksiz. Meni shetsiz-sheksiz qazaq án-kúı ónerine jeteledi. Maǵan dombyramen án aıtý bala shaǵymnan erekshe unaıtyn, bul ónerimdi áli kúnge jetildirýmen kelemin, – dedi belsendi jas.
Ol búginde ýaqytynyń kóp bóligin elimizdegi balalar úılerinde tárbıelenip jatqan jetkinshekterdiń shyǵarmashylyqtaryn damytýǵa arnap keledi. Byltyr «Juldyz bolǵym keledi» atty respýblıkalyq jobany qolǵa aldy. Bul balalar úılerindegi jas talanttarǵa arnalǵan. О́tken jyly alǵash ret vokal óneri boıynsha baıqaý ótip, Astanadaǵy fınaldyq kezeńge elimizdiń ár túkpirinen 40 bala jınaldy. Jeńimpazdar men júldegerlerge Dýbaı qalasyna joldama, qymbat uıaly telefondar men makbýkter syıǵa tartyldy. Jetkinshekterdiń qandaı áserli sezimde bolǵanyn tilmen aıtyp jetkizý qıyn. Alǵashqy saıys nátıjeli ótkenin baıqaǵan Alekseı bıyl horeografııa baǵytyndaǵy jas órenderdi synap kórmekke bel býyp otyr. Onyń fınalynda elordaǵa 100-den asa bala jınalady dep kútiledi.
– Bizdiń qoǵam ázildi jeńil qabyldap, kez kelgen álemdik ózgeristerge batyl túrde kirisip ketetini unaıdy. Memleket basshysynyń ózi de jastar qozǵaýshy kúsh ekenin aıtty. Patrıot bolý jalań uran emes. Qazaq tilin jetik meńgergenim ózim úshin ǵana, biraq ony jeleý etip qyzmet surap kórgen emespin. Otanymyzǵa paıdamyz tısin desek, ony ispen dáleldeýimiz kerek. Keıde keıbir qazaq azamattarynyń óz ana tilin bilmeıtinin kórgende janym ashıdy. Bul kemshilik emes, ósken ortasy sondaı. Biraq ynta bolsa, barlyǵyn lezde úırenýge bolady. Al óziń ósip-ónip otyrǵan memlekettiń ana tiline qurmet kórsetý – ortaq mindetimiz. Shetten kelip, elimizdiń keregesin keńeıtip jatqandarǵa qatysty da solaı aıtar edim. Memlekettik tildi bilý – árbir azamattyń paryzy, dep jalǵady sózin.
Qazirgi ýaqytta Alekseı áleýmettik jelidegi blogin kúndelikti júrgizedi. Bir ǵana Instagram-da 366 myńnan asa oqyrmany bar. Kúndelikti túsiretin rolıkteriniń deni ázil-ospaqqa arnalǵanymen, qoǵamdaǵy keıbir ótkir máselelerdi kórsetýge tyrysady.
– Abaı atamyzdyń «О́zińe sen, ózińdi alyp shyǵar, aqylyń men qaıratyń eki jaqtap» degen dana sózi bar. Bul meniń ómirdegi basty uranyma aınaldy. Kúndelikti ómirde de, jelide de qarapaıym bolýǵa tyrysamyn. Keıbir adamdar meniń rolıkterimdi ata-ájeler jıi kóretinin aıtady. Men úshin bul – maqtanysh. Sebebi olar arqyly nemereleri de tamashalaıdy degen sóz, dep keıipkerimiz sózin támamdady.
Osylaısha, Ertis boıynda jetilgen sary bala búginde Astana qalasynda jemisti eńbek etip júr. Alekseıdiń oıǵa alǵan bastamalary sátimen órile bersin dep tileımiz.
Pavlodar oblysy