Elimizde satyp alý júıesin jetildirýge baǵyttalǵan jańa kezeń bastaldy – Biryńǵaı satyp alý platformasy iske qosylyp, barlyq rásimderdi bir ortaǵa biriktirýge múmkindik týdy, dep jazady Egemen.kz.
2025 jylǵy qańtardan bastap Qazaqstanda «Memlekettik satyp alý týraly» jańa Zań qoldanysqa engizildi. Qujat satyp alynatyn taýarlar, jumystar men kórsetiletin qyzmetterdiń sapasyn arttyrýǵa, rásimderdi jeńildetýge jáne salany sıfrlandyrýǵa baǵyttalǵan.
Zańdaǵy basty jańalyqtardyń biri – memlekettik satyp alý salasyndaǵy ýákiletti organnyń aqparattyq júıesi retinde Biryńǵaı satyp alý platformasyn qurý. Bul júıe memlekettik satyp alý men «Kvazımemlekettik sektordyń jekelegen sýbektileriniń satyp alýy týraly» Zań aıasyndaǵy satyp alýlarǵa elektrondyq qyzmetter arqyly biryńǵaı qoljetimdilik núktesin usynady.
Platforma memlekettik satyp alý veb-portalymen, sondaı-aq kvazımemlekettik sektor men «Samuryq-Qazyna» UÁAQ alańdarymen tolyq ıntegrasııalanǵan. Atap aıtqanda, goszakup.gov.kz, mitwork.kz, zakup.sk.kz júıelerimen baılanys ornatylǵan.
Memlekettik satyp alý: Jańa zańnyń artyqshylyǵy nede?
Sonymen qatar 2025 jyly retteletin satyp alýlar boıynsha derekterdi taldaý jáne biriktirý maqsatynda birqatar mańyzdy júıelerdi ıntegrasııalaý jumystary aıaqtaldy. Olardyń qatarynda memlekettik bilim berý tapsyrysy men oqýshylardyń tamaqtanýyn uıymdastyrý qyzmetteri, dárilik zattar men medısınalyq buıymdardy satyp alý portaldary, medısınalyq uıymdarǵa arnalǵan platformalar, sondaı-aq tabıǵı monopolııalar sýbektileriniń satyp alý alańdary bar.
Qarjy mınıstrliginiń málimetinshe, 2026 jylǵy 28 sáýirdegi jaǵdaı boıynsha Biryńǵaı satyp alý platformasynda 46 793 paıdalanýshy tirkelgen.
Aǵymdaǵy jyly platformanyń fýnksıonalyn keńeıtý kózdelip otyr. Sonyń ishinde jer qoınaýyn paıdalanýshylardyń satyp alý alańymen ıntegrasııa júrgizý josparlanǵan.
Bul bastama «bir tereze» qaǵıdaty boıynsha barlyq retteletin satyp alýlarǵa qoljetimdilikti qamtamasyz etip, paıdalanýshylardyń jumysyn aıtarlyqtaı jeńildetýge múmkindik beredi.
Jalpy, Biryńǵaı satyp alý platformasyn iske qosý – eldiń satyp alý júıesin sıfrlyq transformasııalaýdaǵy mańyzdy qadam. Jańa model ashyqtyqty arttyryp, básekelestikti damytýǵa jáne barlyq qatysýshylar úshin tıimdi ári zamanaýı orta qalyptastyrýǵa yqpal etedi.
Memlekettik satyp alý salasynda JI kómegimen 781 mlrd teńge únemdeldi