Elordada E-LIGHT 2026 halyqaralyq jastar forým-festıvali ótti. Halyqaralyq dıalog kúnine arnalǵan is-shara Energetıkalyq Jibek joly taqyrybyn arqaý etip, energetıka, ınnovasııa, jastar saıasaty jáne mádenı yntymaqtastyq máselelerin talqylaýǵa arnaldy, dep habarlaıdy Egemen.kz.
Forýmǵa Qazaqstan, Qytaı, Túrikmenstan jáne Qyrǵyzstannan kelgen energetıka salasynyń mamandary, memlekettik organdardyń ókilderi, halyqaralyq sarapshylar, ǵalymdar, jas ınjenerler men stýdentter qatysty. Is-sharanyń basty maqsaty – Qytaı men Ortalyq Azııa arasyndaǵy kásibı jáne mádenı dıalogty nyǵaıtyp, jastardyń halyqaralyq yntymaqtastyqtaǵy rólin arttyrý.
CNPC Central Asia Ltd. men CNPC Kazakhstan birlese uıymdastyrǵan festıval Qazaqstandaǵy Qytaı Halyq Respýblıkasynyń Elshiliginiń, Qytaı Saýda palatasynyń jáne Qazaq ulttyq horeografııa akademııasynyń qoldaýymen ótti.
Is-sharanyń ashylýynda qatysýshylar «Jibek jolynyń energetıkalyq izderi» atty kórmeni tamashalady. Kórmede Qazaqstan men Qytaı arasyndaǵy energetıkalyq yntymaqtastyqtyń damý kezeńderi, ınfraqurylymdyq jobalar jáne sıfrlyq tehnologııalardyń salaǵa engizilýi tanystyryldy.
Forýmnyń mádenı baǵdarlamasy erekshe formatta uıymdastyryldy. «Dombyra Saýrdenmen kezdeskende» atty mýzykalyq qoıylymda qazaq jáne qytaı mádenıetiniń úndestigi kórsetildi. Sahnada kúıshi Erjan Álimbetov, qytaılyq oryndaýshy Lıý Hýeı jáne basqa da ónerpazdar óner kórsetti.
Energetıkadaǵy oń ózgeris: Qazaqstan profısıtke qol jetkizdi
Saltanatty ashylý rásiminde Qazaqstandaǵy Qytaı Halyq Respýblıkasy Elshiliginiń, CNPC kompanııasynyń, «Samuryq-Qazyna», «QazMunaıGaz» jáne «QazaqGaz» ulttyq kompanııalarynyń ókilderi sóz sóıledi. Olar energetıka salasyndaǵy halyqaralyq seriktestiktiń mańyzyn atap ótip, jastardyń kásibı áleýetin damytý máselesine toqtaldy.
Forým aıasynda bes paneldik sessııa uıymdastyryldy. Alǵashqy sessııada «Bir beldeý – bir jol» bastamasynyń áleýeti men jańa býynnyń jaýapkershiligi talqylandy. Qatysýshylar óńirlik yntymaqtastyqty damytýdyń jańa múmkindikterine nazar aýdardy.
«Bilim men tájirıbe birligi: jastardyń damýy» atty ekinshi sessııada mamandar kadr daıarlaý, tájirıbe almasý jáne kásibı ósý máselelerin kóterdi. Eńbek naryǵynda teorııalyq bilimmen qatar praktıkalyq daǵdylardyń mańyzy artyp kele jatqany aıtyldy.
Úshinshi paneldik sessııa ǵylymı-tehnıkalyq ınnovasııalarǵa arnaldy. Sıfrlandyrý, jasandy ıntellekt jáne zamanaýı tehnologııalardyń óndiris pen energetıka salasyna áserin sóz etti. Sondaı-aq energetıka sektoryn jańǵyrtýdaǵy ınnovasııalyq sheshimderdiń róli talqylandy.
Atom qýaty: Energetıkalyq beleske senimdi qadam
Forým jumysy «Energetıkalyq Jibek joly: jahandyq turaqtylyq» taqyrybyndaǵy tórtinshi paneldik sessııamen jalǵasty. Sessııa barysynda qatysýshylar óńirlik yntymaqtastyqty tereńdetý, energetıka salasynyń turaqty damýyn qamtamasyz etý jáne halyqaralyq seriktestikti nyǵaıtý máselelerin talqylady.
Forýmnyń qorytyndy paneldik sessııasy «Sıfrlyq shyǵarmashylyq: mádenı biregeılik» taqyrybyna arnaldy. Sıfrlyq dáýirdiń múmkindikterin paıdalana otyryp, ulttyq qundylyqtardy saqtaý, mádenı murany dáripteý jáne jastar arasynda mádenı sáıkestikti nyǵaıtý máseleleri aıtyldy.
E-LIGHT 2026 alańy energetıka, ınnovasııa jáne mádenıet baǵytyndaǵy halyqaralyq yntymaqtastyqty damytýǵa jańa serpin berdi. E-LIGHT 2026 halyqaralyq forým-festıvali Qytaı men Ortalyq Azııa elderiniń jastary arasyndaǵy baılanysty nyǵaıtyp, energetıka, ǵylym jáne mádenıet salalaryndaǵy jańa jobalarǵa jol ashady.
Janbota BAHYTBEK,
EUÝ stýdenti