Fýtboldan Reseı men Katarda ótken sońǵy eki álem chempıonaty álem halyqyn biriktiretin kúsh ekenin aıqyn kórsetti. Alaıda 2026 jylǵy dop dodasy jaqyndaǵan saıyn AQSh-taǵy vızalyq shekteýler men kúsheıtilgen qaýipsizdik tekseristeri halyqaralyq fýtbol qaýymdastyǵynda alańdaýshylyq týǵyzýda, dep habarlaıdy Egemen.kz
Sońǵy aılarda birqatar elderdiń fýtbolshylary, tóreshileri men delegasııa músheleri AQSh aýmaǵyna kirý kezinde túrli kedergilerge tap bolǵany týraly aqparattar jazylyp, kórsetilip jatyr. Bul jaǵdaı fýtbol jankúıerleri men sarapshylar arasynda sportty saıasılandyrý degen pikirtalas týdyryp otyr.
Máselen, О́zbekstan quramasy Nıderlandqa qarsy oıyn aldynda polısııanyń arnaıy tekserýinen ótti. Tekserý barysynda qyzmettik ıtter de paıdalanyldy.
Irak quramasynyń kóshbasshysy Aıman Hýseın AQSh áýejaıynda shamamen jeti saǵat boıy «kúdikti» retinde jaýap bergen. Al komandanyń fotografy on saǵatqa sozylǵan tekserýden keıin el aýmaǵynan ketýge májbúr bolǵan.
Afrıkanyń úzdik tóreshileriniń biri sanalatyn somalılik Omar Artan dıplomatııalyq tólqujaty bola tura AQSh-qa kire almaǵan.
Iran quramasynyń 15 qyzmetkerine amerıkalyq vıza berilmegen. Sonyń saldarynan komanda daıyndyq bazasyn Meksıkada ornalastyrýǵa májbúr boldy. Tipti toptyq kezeńdegi barlyq kezdesýlerin AQSh-ta ótkizse de, ár oıynnan keıin el aýmaǵynan shyǵyp, qaıta kirý tártibin saqtaýǵa týra kelip otyr.
Al Senegal quramasy ushaqtan túspeı turyp-aq ushý-qoný jolaǵynda tekserýden ótkeni habarlandy.
Sarapshylardyń pikirinshe, qaýipsizdik talaptaryn kúsheıtý kez kelgen memleket úshin zańdy qadam bolǵanymen, mundaı jaǵdaılar álem chempıonatynyń negizgi qundylyqtaryna kóleńke túsirýi múmkin. О́ıtkeni fýtboldyń basty mıssııasy – ulttar men mádenıetterdi jaqyndastyrý. Al qatysýshylardyń tólqujaty nemese shyqqan eline baılanysty shekteýler týrnırdiń ashyqtyǵy men qoljetimdiligi týraly suraqtar týyndatady.
Ázirge 2026 jylǵy álem chempıonaty bastalǵan joq. Sondyqtan onyń «tarıhtaǵy eń nashar álem chempıonaty» bolatynyn aıtý erte. Degenmen týrnır qarsańynda týyndaǵan vızalyq jáne shekaralyq máseleler uıymdastyrýshylar úshin mańyzdy syn-qaterge aınalyp otyr. Eger mundaı jaǵdaılar jalǵasa berse, jankúıerler men qatysýshylardyń kóńil-kúıine áser etýi ábden múmkin.
Aıtpaqshy, álem chempıonatyn tikeleı efırden kórsetiletin ýaqyt beldeýi bizdiń el úshin qolaıly dep aıtýǵa kelmeıdi. Kezdesýlerdiń basym bóligi tún jarymda, tańǵa jaqyn nemese jurt jumysqa baratyn tańerteńgi ýaqytqa sáıkes kelip tur. Sondyqtan, osy jolǵy álem chempıonaty fýtbol jankúıerleriniń shydamyn shyńdaıtyn synaq bolmaq.
Álem chempıonatynyń toptyq kezeńinde dop tebetin barlyq komandalardyń kestesi men ýaqytyn osy jerden kórýge bolady.
Aıta keteıik, fýtboldan álem chempıonaty 11 maýsym men 19 shilde aralyǵynda AQSh, Kanada jáne Meksıkada ótedi.
Fýtboldan Álem chempıonatyn qaıdan kórýge bolady?