Qyzylorda oblysynda elimizdegi eń iri qorǵalatyn aýmaqtardyń biri – «Aral ormany» memlekettik tabıǵı rezervaty qurylýy josparlanyp otyr. Jańa qoryqtyń jalpy aýmaǵy mıllıon gektardan asady, bul ony Qazaqstandaǵy eń aýqymdy tabıǵı rezervatqa aınaldyrmaq, dep habarlaıdy Egemen.kz.
24.kz málimetinshe, aýqymdy ekologııalyq jobanyń negizgi maqsaty – sekseýil ormandaryn saqtaý jáne qalpyna keltirý. Qazirgi tańda Syr óńirindegi orman qorynyń 83% sekseýil alqaptaryna tıesili. Bul ósimdik Aral teńiziniń qurǵaǵan tabanynan ushatyn tuzdy shań men qum kóshkinine tabıǵı tosqaýyl bolyp, ekojúıeni qorǵaýda mańyzdy ról atqarady.
Sonymen qatar, jańa rezervat ǵalymdarǵa óńirdiń qatal klımatyna beıimdelgen flora men faýnany júıeli túrde zertteýge múmkindik beredi.
Sekseýildi alqaptyń aýqymy keńeıedi
Tabıǵı resýrstar jáne tabıǵat paıdalanýdy retteý basqarmasynyń basshysy Ǵalymjan Erkebaıdyń aıtýynsha, árbir sekseýil aǵashy keminde 2,5-3 tonnaǵa deıin topyraqty ustap tura alady. Bul topyraqtyń kóshýin azaıtyp, tuzdanýdy tómendetýge yqpal etedi. Sonymen birge flora men faýnanyń ózgerýine de áser etedi. 2021-2022 jyldary egilgen sekseýilder arasynda qulandar men qoıandardyń izderi jıi kezdesip otyr.
Jańa rezervattyń qurylýy ekojúıeni saqtaýǵa, shóleıttenýge qarsy kúresti kúsheıtýge jáne bıoalýantúrlilikti qorǵaýǵa baǵyttalǵan mańyzdy qadam bolmaq.
Araldyń qurǵaǵan tabanyna 48,7 mln sekseýil otyrǵyzylǵan