Qazaqstanda tutynýshylyq nesıelerdiń ósý qarqyny qarjy retteýshileriniń engizgen shekteý sharalarynan keıin baıaýlaı bastaǵan. Al bızneske beriletin nesıeler kerisinshe joǵary qarqynmen ósip otyr. Bul týraly Ulttyq bank tóraǵasy Tımýr Súleımenov Májilis kýlýarynda málimdedi, dep habarlaıdy Egemen.kz.
Jýrnalıster Ulttyq bank basshysynan halyq pen bıznes arasyndaǵy qaryz júktemesiniń artýy jaǵdaıynda resmı statıstıkanyń qanshalyqty shynaıy ekenin jáne qarjylyq turaqtylyqty saqtaý úshin qandaı sharalar qabyldanyp jatqanyn surady.
Súleımenovtiń aıtýynsha, sońǵy 3-4 jylda halyqqa beriletin nesıeler jyl saıyn shamamen 30 paıyzǵa ósip kelgen. Osyǵan baılanysty Ulttyq bank Qarjy naryǵyn retteý agenttigimen birge tutynýshylyq nesıeleýdi shekteýge baǵyttalǵan birqatar shara qabyldaǵan.
Atap aıtqanda, halyqqa beriletin nesıeler boıynsha artyq ósimdi tejeý úshin sektorlyq kontrsıkldik kapıtal býferi engizilgen.
Mamandar keńesi: Nesıe alarda neni eskerý kerek?
Sonymen qatar tutynýshylyq nesıelerdiń merzimine qoıylatyn talaptar kúsheıtildi. Buryn mundaı nesıeler 5, 7, tipti 9 jylǵa deıin berilip, aı saıynǵy tólem mólsherin azaıtý arqyly shekteýlerdi aınalyp ótýge múmkindik bolǵan.
Budan bólek salyqtyq ózgerister de engizildi: endi bankterdiń halyqqa bergen nesıeden túsetin tabysyna 25% salyq salynady, al bızneske beriletin nesıeler boıynsha korporatıvtik tabys salyǵy 20% deńgeıinde saqtalǵan.
Ulttyq bank tóraǵasynyń aıtýynsha, bul sharalar bankterdi halyqqa qaraǵanda bızneske kóbirek nesıe berýge yntalandyrady.
Tabysynan 8 ese kóp qaryzy barlarǵa nesıe berilmeıdi: Ulttyq bank jańa shekteý engizedi
Qazirgi derekterge sáıkes, qabyldanǵan sharalardyń nátıjesinde tutynýshylyq nesıelerdiń ósýi shamamen 10 paıyzǵa deıin baıaýlaǵan, al bıznes nesıeleri shamamen 18 paıyz qarqynmen ósip keledi.