Máselen, Senat depýtattary Narıman Tóreǵalıev pen Erbolat Muqaev Batys Qazaqstan oblysyna jumys babyndaǵy sapar aıasynda birneshe aýyldarda bolyp, jergilikti halyqpen kezdesti.
Jańabulaq aýyldyq Mádenıet úıinde jergilikti atqarýshy organ ókilderi, máslıhat depýtattary, aýyldyq okrýg ákimderi, basqa da mekeme basshylary jáne turǵyndarmen bolǵan kezdesýde ataýly áleýmettik kómekti taǵaıyndaý, tórtinshi deńgeıli bıýdjetke kóshý, salyq jınaý, turǵyn úı kezegi máseleleri kóterildi.
Senatorlar jumys saparyn aýdan ortalyǵynda odan ári jalǵastyryp, 100 oryndyq ınternat, 300 oryndyq mektep-gımnazııa, 3 qabatty kommýnaldyq turǵyn úıdiń qurylysymen tanysty.
Sondaı-aq N.Tóreǵalıev pen E.Muqaev Býdarın aýyldyq okrýgindegi «Atamura» sharýa qojalyǵynda da boldy. Sharýa qojalyqtary kóktemgi jáne kúzgi dalalyq jumystar kezinde janarmaı baǵasynyń qymbattaıtynyn aıtyp, maýsym kezinde jeńildik berýin nemese sýbsıdııa bólýin surady.
* * *Arys qalasynyń balalary 12 shilde men 3 tamyz aralyǵynda demalý úshin Almatyǵa kelgen bolatyn.
Olar qala mańynda ornalasqan «О́rnek» jazǵy saýyqtyrý lagerinde demalady. Tótenshe jaǵdaılardan zardap shekken 150 bala saýyqtyrý sharalarynan ótýge jáne ýaqytyn jaqsy ótkizýge múmkindik alyp otyr. Jas qonaqtardyń alǵashqy tobyn almatylyqtar perronda kútip aldy. Parlament Senatynyń depýtaty Dınar Nóketaeva da jas meımandardy qarsy alýshylardyń arasynda boldy. Senator jetkinshektermen áńgimelesip, olardyń bárine demalystarynyń jaqsy ótýine tilektestigin bildirdi.
* * *Májilis depýtattary Asylbek Smaǵulov pen Natalıa Jumadildaeva aımaqtarda saılaýshylarmen kezdesýde.
Turǵyndarmen kezdesýler barysynda depýtattar azamattardyń ózekti máselelerin talqylap, ózderiniń zań shyǵarýshylyq jumysy, Májilistiń qyzmeti týraly áńgimeledi.
Osyndaı sharalardyń biri Qaraǵandyda ótti. Halyq qalaýlylary Ishki ister mınıstrliginiń akademııasynda aımaqtaǵy quqyq qorǵaý organdarynyń qyzmetkerlerimen kezdesti.
Kezdesýde Memleket basshysynyń tapsyrmalary men elimizdiń ekonomıkalyq jáne áleýmettik saıasaty týraly aıtyldy.
Is-shara sońynda depýtattar jınalysqa qatysýshylardyń suraqtaryna jaýap berip, ózara pikir almasty. * * *Májilis depýtattary Magerram Magerramov jáne Narıne Mıkaelıan Qostanaı oblysynyń Rýdnyı qalasynda saılaýshylarmen kezdesti.
Depýtattar ákimdikte prokýratýra, sot, polısııa, órt sóndirýshiler men basqa da salalar ókilderimen kezdesip, oblystyń áleýmettik nysandaryn aralap, etnomádenı ortalyqtarǵa bardy.
Osy kúni Májilis depýtaty Turǵyn Syzdyqov arnaıy áleýmettik qyzmetter sapasyna baılanysty Aqmola oblysynyń Býrabaı aýdanynda kezdesý ótkizdi.
Shýche qalasyndaǵy arnaıy áleýmettik qyzmetter ortalyǵyna barǵan depýtat ondaǵy qyzmet kórsetý sapasymen, jabdyqtarmen tanysty.
* * *Shymkent qalasynda Májilis depýtaty Nurjan Áltaev birqatar kezdesýler ótkizdi.
Depýtat «Continental Logistics Shymkent» kólik-logıstıkalyq ortalyǵynyń jumysymen tanysyp, ujymymen kezdesti.
2017 jyldyń jeltoqsan aıynda iske qosylǵan A+ sanatyndaǵy «Continental Logistics Shymkent» kesheniniń búgingi jumysy qarqyndy. Munda qurǵaq jáne klımattyq qoımalardan bólek, konteınerlik termınal, kedendik resimdeý aımaǵy men ilespeli qurylymdary bar. * * *Májilis depýtattary Qanat Mýsın, Shavhat О́temisov Batys Qazaqstan oblysy Zashaǵan kentindegi «Nurly jer» baǵdarlamasy boıynsha salynyp jatqan 9 qabatty úıdiń qurylysymen tanysty.
«Nurly jer» memlekettik turǵyn úı qurylysy baǵdarlamasynyń negizgi maqsaty – halyq úshin turǵyn úıdiń qoljetimdiligin arttyrý.
– «Nurly jer» baǵdarlamasy aıasynda qazirgi tanda elimizde myńdaǵan páter salynýda. Nátıjesinde, kóptegen jerlesterimiz turǵyn úıge qoldaryn jetkizip jatyr. Bárimizge belgili sońǵy ýaqytta kóp balaly otbasylardy turǵyn úımen qamtamasyz etý jumystaryna basa nazar aýdarylýda. Elbasynyń tapsyrmasy boıynsha jyl saıyn 50 mlrd teńge qarajat bólinetin bolady, – dedi Májilis depýtaty Shavhat О́temisov.