Tilalǵysh kómekshi
Apple kompanııasynyń Siri nemese Android tektes smartfonyńyzdaǵy «Iаndekstiń» Alisa atty kómekshileri osy jasandy ıntellekt negizinde qyzmetterin júzege asyrady. Tolyqqandy bolmasa da, atalǵan baǵdarlamalar gadjet ıesimen áńgimelesip, keıbir aýyzsha bergen buıryqtaryńyzdy oryndap beredi. Aýa raıyn suraı salasyz, smartfonyńyzdaǵy uıqyasharyńyzdyń ýaqytyn qoıdyra alasyz degendeı ótinishterdi jerde qaldyrmaıdy.
Jaqynda jańalyqtardan bir baǵdarlamashy jigit qoly bos emes kezde qalyńdyǵymen sóılesetin bot jasap shyǵarǵanyn qulaǵymyz shaldy. Bylaı qarasańyz, tıimdi sııaqty. Quda da tynysh, qudaǵı da tynysh degenge keledi. Al biraq bul ónim tolyǵymen adamdy almastyra almaıtyny, sezimge berile almaıtyny jáne sol arqyly sizdiń qýanyshyńyz ben qaıǵy-muńyńyzdy bólise almaıtyny túsinikti. Biraq qarapaıym tehnıkalyq turǵydaǵy jumystardy oryndaı alatyn bolsa, onyń paıdasy shash-etekten sııaqty. Esik aldyndaǵy aýlańyzdy sypyryp qoısa, balańyzdy oınatsa, úıińizdi jınaıtyn bolsa, siz qýanbaǵanda kim qýanady? Onsyz da jumystan sharshap, keshke úıine jyǵylyp-súrinip jetetin adamǵa osyndaı kómekshisi bolǵan degen bir keremet emes pe?
Adamnan da aqyldy
Adamdarmen shahmat oınap, tipti álem chempıondaryn jeńip ketetin robottardy buryndary kórdik. Garrı Kasparov 1997 jyly qarymta matchta «Dıp Blıý» atty sýperkompıýterden 3,5:2,5 esebimen jeńilip qalsa, 2006 jyly taǵy bir shahmattan álemdik tájdi kıgen Vladımır Kramnık «Dıp Frıs» atty mashınadan 4:2 esebimen tize búkken.
Endi Rýbıktiń kýbıgin 20 ret qana burap jınaı salatyn neırojúıe óziniń adamnan áldeqaıda aqyldy ekenin dáleldep otyr. Adamdar arasynan sýyrylyp shyqqan myqtynyń ózi kýbıkti 50 ret aınaldyrady eken. Kalıfornııa ýnıversıtetiniń ǵalymdary adam logıkasy qınalyp baryp ári ýaqyt joǵalta otyryp sheshetin esepti áp-sátte oryndaı salatyn osyndaı robot jasap shyǵarǵan.
Saıası oıyndar
AQSh pen Ulybrıtanııa sııaqty derjavalyq elderde qalyptasqan júıe boıynsha bılikte alma-kezek eki partııa aýysyp otyrady. Erteń solar asa daýly bir saıası nemese áskerı máselede kelise almaı, jeme-jemge kelgende bir-birine senbeı, araaǵaıyndyq jasasyn dep tizgindi osy jasandy ıntellektke senip tapsyratyn kún týmaı ma eken? Álbette, siz joq dersiz. Biraq qazirgi tehnologııanyń jyldam damyǵan zamanynda oǵan da erte jetip qalýymyz bek múmkin. Qolyna memlekettiń tizgini tıgen jasandy ıntellektińiz ózinshe sheshim shyǵaryp, adamǵa baǵynbaı ketse jaǵdaı qalaı bolar eken? Sonda Ilon Masktyń aıtqanyndaı, jasandy ıntellekt obrazyndaǵy «jaýyńyz» Soltústik Koreıadan da qaýipti degenin kesh túsinetin jaǵdaı týyp qalmas pa eken?
Bulaı paıym jasaýymyzdyń sebebi – joǵaryda aıtylǵan dúnıelerdi biraz jyldar buryn robottar atqarady dese eshqashan múmkin emesteı kórinetin. Al qazir oǵan tipten tańǵalmaıtyn boldyq. Sondaı tendensııamen kete bersek, saıası oıyndar sheshimin de adamzat úshin jasandy ıntellekt shyǵaryp bere salýy yqtımal ǵoı. Jasandy ıntellektke júginýge adamzatty májbúrleıtin taǵy bir faktor – ol beıtarap bolady-mys degen oılardyń aıtylýy.
Qudaımen báseke
Jasandy ıntellekt jasaýshylardyń túpki maqsaty adam ıntellektisin almastyra alatyn dúnıe jasaý ekendigi belgili. Al onyń ar jaǵynda Qudaıdyń ornynda adam jasaýǵa umtylys degen sóz. Túptiń túbinde adamnyń túbine jetetin osy jasandy aqyl-oı bolmasa ıgi.