JITS profılaktıkasy jáne oǵan qarsy kúres jónindegi oblystyq ortalyq baspasóz qyzmetiniń habarlaýynsha, bıyl esepte turǵan balalardyń sany birden tórte esege artqan. Bul sanattaǵy syrqattardyń kóbeıýine elimizdiń basqa óńirlerinen, onyń ishinde Ońtústik Qazaqstan oblysynan kóship kelýi sebep bolǵan.
«VICh juqqan balalardyń eń úlkeni 12-de. Otbasynyń tuńǵyshy. Ata-anasymen turady, jalpy bilim beretin mektepte oqıdy. Antıretrovırýsty terapııadan ótip, qajetti dári-dármekti alyp turady», deıdi ortalyqtyń emdeý-profılaktıkalyq jumystar jáne dıspanserızasııa bóliminiń meńgerýshisi Olga Shılkına.
VICh juqtyrǵan alǵashqy bala Qyzyljar aýdanynda tirkelgen. Qyz bala Máskeý qalasynda em qabyldaǵanymen, keseldiń asqynýy saldarynan 13 jasynda balalar úıinde qaıtys bolypty. VICh syrqatynan saqtaný sharalary respýblıkalyq, qoǵamdyq uıymdardyń bastamasymen ótetin semınar-trenıngterde jan-jaqty aıtylǵanymen, mán bermeýshiliktiń aqyry qaıǵyly jaǵdaılarǵa ushyratyp jatady.
Infeksııa sábılerge kóp jaǵdaıda anasynan berilse, jasóspirimder esirtki qabyldaý barysynda jáne erte jastan qorǵanyshsyz jynystyq qatynasqa túskende juqtyratyn kórinedi. Ekiqabat áıelden ınfeksııa tabylǵan jaǵdaıda birden antıretrovırýs terapııasynan ótedi. Sábıge de VICh-ke qarsy dáriler onyń salmaǵyna qaraı sıroppen beriledi.