Júzdesý barysynda agroónerkásip keshenin damytýdyń ózekti máseleleri talqylandy. Aýyl sharýashylyǵy taýaryn óndirýshilerdi sýbsıdııalaý, onyń ishinde uzaq merzimge sýbsıdııa berýdiń tıimdiligi men qajettigi týraly aıtylyp, memlekettiń qoldaýyn talap etetin barlyq shyǵyndar sýbsıdııalanbaıtynyna nazar aýdaryldy. Mysaly, fýngısıdterge sýbsıdııalardyń berilmeýi saldarynan aýyl sharýashylyǵy salasyna edáýir zııan keledi. Bul másele oń sheshimin tapsa, aýyl sharýashylyǵynyń ónimderi ulǵaıyp, eńbekkerlerdiń tabysy molaıa túsetin bolady.
Aýyl sharýashylyǵy taýarlaryn óndirýshiler traktorlar men kombaındarǵa arnalǵan kádege jaratý alymy boıynsha usynystar aıtty. Senat depýtattary aýyl sharýashylyǵy kásiporyndary basshylarynyń barlyq usynystaryn jazyp alyp, olardy aýyl sharýashylyǵy mınıstrliginiń basshylyǵymen talqylaıtyndaryn jetkizdi.